Міністр унутраных спраў Літвы Уладзіслаў Кандратовіч заявіў, што ўрад рыхтуе новыя змены ў заканадаўства, якія абавяжуць замежнікаў валодаць літоўскай мовай. Паводле яго слоў, папраўкі будуць прадстаўлены ў Сейм, піша LRT са спасылкай на ELTA.
Пры гэтым Кандратовіч адзначыў, што патрабаванне ведаць мову з першых дзён працы ў краіне ён лічыць ненатуральным.
«Магчыма, не два гады, не тры гады, але калі ў чалавека ёсць доўгатэрміновая перспектыва і ён бачыць сябе ў Літве, то мы лічым, што праз пяць гадоў пражывання ў Літве з васьмі ён ужо павінен гаварыць і валодаць нашай дзяржаўнай мовай», — заявіў кіраўнік ведамства.
Асобна міністр вылучыў украінцаў з часовым прытулкам: паводле яго слоў, тыя, хто звязвае сваю будучыню з Украінай, будуць ведаць літоўскую роўна настолькі, наколькі гэта патрэбна для жыцця ў Літве сёння.
«У сферы паслуг, дзе павінна аказвацца паслуга і выкарыстоўвацца наша дзяржаўная мова, гаварыць па-літоўску неабходна, там пытанняў не ўзнікае, прыбыўшыя людзі павінны гэта рабіць. Але ў іншых сектарах, асабліва ўлічваючы, што сёння ў нас шмат украінцаў з часовым прытулкам, (…) яны, хутчэй за ўсё, нават пасля чатырох гадоў вайны, калі звязваюць сваю будучыню з Украінай, будуць ведаць мову роўна настолькі, наколькі ім гэта патрэбна для жыцця ў Літве сёння», – сказаў ён.
Заява рушыла пасля прапановы мэра Вільнюса Валдаса Бенкунскаса не працягваць від на жыхарства праз тры гады асобам з “нулявым узроўнем літоўскай мовы”. Ён пацвердзіў, што ўжо звярнуўся да кіраўніка МУС з заклікам ініцыяваць адпаведныя папраўкі ў Сейме.
Паводле даных муніцыпалітэта, у сталіцы пражываюць 76 тысяч замежнікаў, з якіх 61 тысяча — грамадзяне краін, якія не ўваходзяць у ЕС.
Папраўкі, што ўзмацняюць моўную інтэграцыю замежнікаў, Сейм разглядае яшчэ з канца верасня па ініцыятыве лідара кансерватараў Лаўрынаса Кашчунаса. Свае прапановы ўнёс і прэзідэнт Гітанас Наўседа — у прыватнасці, выдаваць дазволы на часовую працу хутчэй і ў прыярытэтным парадку, максімум на двухгадовы тэрмін.
Паводле даных Дэпартамента міграцыі, часовы від на жыхарства ў Літве маюць 189 тысяч замежнікаў.