Круглы стол паміж беларускімі дэмсіламі і ўладамі можа вырашыць праблему транзіту ўлады і пазбегнуць сцэнару распаду дзяржаўнай сістэмы, заявіў намеснік кіраўніка АПК Павел Латушка ў інтэрв’ю польскаму выданню Rzeczpospolita.
«Адмова ад унутранага вырашэння крызісу і ад дыялогу можа прывесці да таго, што лёс краіны будзе залежаць ад знешніх фактараў. А самым небяспечным з іх з’яўляецца Расія», — адзначыў Латушка.
Латушка падкрэсліў, што нягледзячы на сігналы Дональда Трампа ў адрас Лукашэнкі, рэпрэсіі ў Беларусі ўзмацняюцца.
«У 2025 годзе, паводле даных праваабарончага цэнтра “Вясна”, Лукашэнка памілаваў 342 чалавекі. Адначасова статус палітычнага зняволенага атрымалі 509 чалавек, а 189 былі дэпартаваныя. Такім чынам, мы маем справу з адваротнай статыстыкай. Рэпрэсіі не спыняюцца — наадварот, яны ўзмацняюцца. Па-ранейшаму ў турмах застаецца не менш за 1200 вязняў сумлення», — адзначыў палітык.
Латушка лічыць, што ЗША могуць стаміцца ад перамоў з Лукашэнкам і звярнуцца да іншых інструментаў ціску.
«Лукашэнка падманвае амерыканцаў. І, як я мяркую, амерыканцы не наіўныя. Тут трэба захоўваць рэалізм: ніякай аперацыі па вывазе Лукашэнкі з Мінска не будзе. Аднак у нейкі момант амерыканцы могуць стаміцца ад гэтых перамоў. Ім можа надакучыць такая гульня, і тады яны звернуцца да іншых інструментаў ціску на Лукашэнку», — заявіў Латушка.
Намеснік кіраўніка АПК лічыць, што вырашыць праблему транзіту ўлады могуць нацыянальны дыялог і круглы стол.
«Рашэннем праблемы транзіту ўлады можа стаць круглы стол. Гэта самая перспектыўная магчымасць для нашай краіны цывілізавана вярнуцца да нармальнага жыцця. Такі шлях дазволіў бы зняць санкцыі і вярнуць замежныя інвестыцыі, пазбегнуць сцэнару некантраляванага распаду дзяржаўнай сістэмы, а таксама забяспечыць планавы, дэмакратычны пераход улады без узрушэнняў.
Мы ведаем, што Лукашэнка не хоча размаўляць і ніколі не быў і не з’яўляецца гатовым да дыялогу з апазіцыяй. Аднак мы выдатна разумеем, што эліты вакол Лукашэнкі неаднародныя. Большасць прадстаўнікоў сістэмы, сфармаванай вакол яго, выступаюць за захаванне незалежнасці і дзяржаўнасці краіны.
Яны павінны ўсведамляць, што пасля сыходу Лукашэнкі могуць страціць усё. Яны бачылі, што адбылося ў Каракасе. Адмова ад унутранага вырашэння крызісу і ад дыялогу можа прывесці да таго, што лёс краіны будзе залежаць ад знешніх фактараў. А самым небяспечным з іх з’яўляецца Расія», — заявіў Латушка.
Ён таксама папярэдзіў аб небяспецы перамоў паміж ЕС і беларускімі ўладамі без удзелу дэмсіл.
«Калі Брусель пачне весці перамовы з Мінскам за нашай спінай, гэта будзе азначаць здраду нашых агульных каштоўнасцяў», — падкрэсліў Латушка.
Нагадаем, Аб’яднаны пераходны кабінет заклікаў Лукашэнку да правядзення круглага стала ў жніўні 2025 года, а пасля венесуэльскіх падзей паўтарыў свой заклік «для прадухілення калапсу дзяржаўнасці». Лукашэнка заяўляў у жніўні, што не будзе весці дыялог з апанентамі.
