Аб’яднаны пераходны кабінет апублікаваў зварот да афіцыйнага Мінска ў сувязі з арыштам Нікаласа Мадуры. У ім ён заклікаў «дэ-факта ўлады Беларусі» да нацыянальнага дыялогу. У заяве падкрэсліваецца, што круглы стол для пераадолення палітычнага крызісу — гэта сродак пазбегнуць калапсу дзяржаўнасці.
“Арышт Нікаласа Мадуры 3 студзеня 2026 года ў новай глабальнай палітыцы стаў паказальным сігналам для кожнага аўтарытарнага рэжыму: ні гады кіравання дзяржаўным апаратам, ні кантроль над арміяй, ні знешняя падтрымка паплечнікаў не з’яўляюцца гарантыямі захавання ўлады. Мадура адмовіўся ад дыялогу з апазіцыяй, абраў рэпрэсіі замест легітымнасці, лічыў сілавыя структуры сваёй непрыступнай абаронай — і жорстка памыліўся. У выніку лёс Венесуэлы цяпер будзе ў значнай ступені залежаць ад знешніх фактараў”, — гаворыцца ў заяве.
На гэтым фоне АПК пацвярджае сваю прапанову па арганізацыі нацыянальнага дыялогу.
“Усведамляючы сваю адказнасць за захаванне суверэнітэту Беларусі, Кабінет пацвярджае ініцыятыву па правядзенні нацыянальнага дыялогу, выкладзеную ў Заяве ад 9 жніўня 2025 года. Мы настойваем на тым, што адзіным сродкам прадухілення калапсу дзяржаўнасці з’яўляецца арганізацыя круглага стала для выхаду з палітычнага крызісу ў Беларусі”, — гаворыцца ў заяве.
У АПК падкрэслілі, што ўнутраная грамадзянская згода неабходная, каб забяспечыць стабільнасць у ходзе неабходных для краіны палітычных пераўтварэнняў, выхаду на цывілізаванае вырашэнне ўнутраных праблем, зняцце санкцый, вяртанне інвестыцый і аднаўленне канструктыўнага міжнароднага супрацоўніцтва.
“Урок Каракаса паказвае, што вокны магчымасцяў хутка зачыняюцца, таму ігнараванне ініцыятывы Круглага стала можа прывесці да сцэнарыяў, пры якіх цывілізаваны грамадзянскі дыялог будзе заменены іншымі некантраляванымі працэдурамі, якія могуць уяўляць пагрозу незалежнасці Рэспублікі Беларусь.
Беларусы заслугоўваюць дэмакратычнага кіравання, устойлівага эканамічнага развіцця і нармалізацыі міжнародных адносін. Кожная службовая асоба павінна несці адказнасць за выбар аптымальных шляхоў для паспяховага развіцця нашай краіны”, — гаворыцца ў заяве.