Дарадца Святланы Ціханоўскай па дыпламатычных пытаннях Дзяніс Кучынскі ў Вашынгтоне правёў шэраг сустрэч з прадстаўнікамі Белага дома і Дзярждэпартамента. Пра гэта ён паведаміў у сетцы X.
Паводле слоў Кучынскага, ён сустракаўся з намеснікам саветніка па нацыянальнай бяспецы ЗША Эндзі Бейкерам і спецыяльным памочнікам прэзідэнта, старшым дырэктарам па справах Еўропы і Расіі ў Савеце нацыянальнай бяспекі Чарльзам Маклафлінам. Таксама адбылася сустрэча са спецпасланнікам прэзідэнта ЗША Джонам Коўлам і намеснікам памочніка дзяржаўнага сакратара Крысам Смітам.
Падрабязнасці сустрэч Дзяніс Кучынскі не прывёў, адзначыўшы толькі, што ён выказаў падзяку за вызваленне палітвязняў у Беларусі. У цэлым свой візіт у Вашынгтон дарадца Ціханоўскай назваў высокапрадуктыўным.
Таксама Кучынскі паведаміў, што сустракаўся з выканаўчым дырэктарам Freedom House Джэймі Флаем і з рэзідэнтам і выканаўчым дырэктарам Цэнтра аналізу еўрапейскай палітыкі (CEPA) Алінай Паляковай.
Дарадца Ціханоўскай выказаў асаблівую падзяку камандзе Freedom House у Літве на чале з Віцісам Юрконісам, “за іх самаадданую працу па аказанні дапамогі былым палітычным зняволеным у аднаўленні іх жыцця пасля вызвалення”. Ён падкрэсліў, што далейшая падтрымка “такіх надзейных партнёраў, як Freedom House, надзвычай важная”.
“У нас адбылася змястоўная дыскусія пра палітыку ЕС і ЗША ў дачыненні да Беларусі, а таксама пра магчымасці ўключэння гэтай тэмы ў сумесныя мерапрыемствы і ініцыятывы ў будучыні”, – напісаў Кучынскі пра сустрэчу з Паляковай.
