Міністры замежных спраў краін Паўночнай Еўропы і Балтыі (NB8) 29–30 красавіка правялі сустрэчу ў эстонскім Курэссаарэ і прынялі сумесную заяву, у якой закранулі ў тым ліку сітуацыю ў Беларусі.
У дакуменце Беларусь названа саўдзельніцай расійскай вайны супраць Украіны. Міністры абвінавацілі Мінск у працягненні ўнутраных рэпрэсій і гібрыдных аперацый супраць суседніх краін і заявілі, што да змены гэтай сітуацыі перагляд адносін з Беларуссю выключаны. Краіны NB8 пацвердзілі падтрымку беларускіх дэмакратычных сіл і намер нарошчваць эканамічны ціск на Беларусь праз гандлёвыя меры і тарыфную палітыку.
“Беларусь застаецца саўдзельнікам агрэсіўнай вайны Расіі і працягвае ўнутраныя рэпрэсіі і гібрыдныя дзеянні супраць сваіх суседзяў. Пакуль гэта не спыніцца, мы не будзем пераглядаць нашы адносіны. Мы працягваем падтрымліваць беларускія дэмакратычныя сілы.
Мы падкрэсліваем важнасць эканамічнай бяспекі як складовай часткі нашай адкрытай стратэгічнай аўтаноміі. Мы імкнёмся скараціць стратэгічную залежнасць, у тым ліку ў сферы энергетыкі, крытычна важных мінералаў і тэхналогій, умацаваць устойлівасць ланцужкоў паставак, а таксама абараніць крытычна важныя тэхналогіі і інфраструктуру ад варожага ўплыву. Мы будзем і надалей узмацняць ціск на эканомікі Расіі і Беларусі з дапамогай гандлёвых мер і тарыфнай палітыкі. Сістэмныя парушэнні міжнароднага права падрываюць давер, неабходны для эканамічнага і інстытуцыйнага супрацоўніцтва”, — гаворыцца ў заяве.
Міністры пацвердзілі падтрымку Украіны на шляху да членства ў ЕС і НАТА, назваўшы яе інтэграцыю ў еўрапейскую сям’ю неабходнай умовай для бяспекі ўсёй Еўропы. Яны заклікалі партнёраў забяспечыць Украіне доўгатэрміновую падтрымку і прадаставіць юрыдычна абавязковыя гарантыі бяспекі.
Расія названа найбольш значнай “прамой і доўгатэрміновай пагрозай еўраатлантычнай бяспецы”. Міністры пацвердзілі прыхільнасць захаванню і ўзмацненню санкцый, у тым ліку супраць расійскага ценявога флоту, і выступілі за працяг ізаляцыі Расіі ў міжнародных спартыўных і культурных мерапрыемствах. Таксама яны выказалі падтрымку як мага хутчэйшаму стварэнню Спецыяльнага трыбунала па злачынстве агрэсіі супраць Украіны.
Асобна закранута тэма гібрыдных атак і замежнага ўмяшання ў інфармацыйную прастору. Міністры заявілі пра намер узмацніць устойлівасць сваіх грамадстваў, павышаць дасведчанасць пра падобныя пагрозы і павялічваць выдаткі для тых, хто за імі стаіць.
