Кангрэс ЗША можа прагаласаваць за новыя санкцыі супраць Расіі. Пра гэта паведаміў сенатар Ліндсі Грэм. Паводле яго слоў, прэзідэнт ЗША Дональд Трамп даў зялёнае святло яго законапраекту.
“Пасля сённяшняй вельмі прадуктыўнай сустрэчы з прэзідэнтам Трампам, на якой абмяркоўваўся цэлы шэраг пытанняў, ён ухваліў двухпартыйны законапраект аб санкцыях супраць Расіі, над якім я працаваў некалькі месяцаў разам з сенатарам Блюменталем і многімі іншымі. Гэта будзе вельмі дарэчы, паколькі Украіна ідзе на саступкі дзеля міру, а Пуцін толькі і робіць, што працягвае забіваць нявінных”, — напісаў Грэм у сетцы Х.
Паводле яго слоў, законапраект дасць магчымасць уводзіць санкцыі супраць пакупнікоў расійскай нафты. Грэм лічыць, што ён дасць Трампу рычагі ўплыву на Кітай, Індыю і Бразілію.
“Я спадзяюся на ўпэўненае двухпартыйнае галасаванне, спадзяюся, ужо на наступным тыдні”, — дадаў Грэм.
Праект быў прапанаваны яшчэ вясной мінулага года, аднак не выносіўся на галасаванне, бо Трамп аддаваў перавагу рабіць іншыя крокі. Нагадаем, раней Грэм прапаноўваў уводзіць пошліны ў памеры 500% у дачыненні да тавараў з краін, якія купляюць расійскія нафту, нафтапрадукты, прыродны газ або ўран.
