Вярхоўны прадстаўнік ЕС па замежных справах і палітыцы бяспекі Кая Калас не разлічвае на зацвярджэнне 20-га пакета санкцый супраць Расіі на сённяшнім пасяджэнні Савета па замежных справах. Пра гэта яна заявіла перад сустрэчай міністраў замежных спраў краін ЕС.
“Мы абмяркуем Украіну. Заўтра спаўняецца чатыры гады з дня гэтай жахлівай вайны. Таму, вядома, будзе абмеркаванне 20-га пакета санкцый, але, як вы ўсе ведаеце, я думаю, сёння прагрэсу ў гэтым пытанні не будзе, але мы абавязкова прыкладзём намаганні ў гэтым кірунку”, — сказала яна.
Нагадаем, учора прэм’ер-міністр Венгрыі Віктар Орбан заявіў, што яго краіна заблакуе рашэнне аб 20-м пакеце санкцый. Паводле яго слоў, гэта адказ Венгрыі на прыпыненне паставак нафты праз Украіну. Акрамя блакіроўкі пакета, ён таксама паабяцаў не дапусціць прадастаўлення Кіеву еўрапейскага фінансавання і спыніў пастаўкі дызельнага паліва. Нафта не паступае па “Дружбе” ў Венгрыю пасля пашкоджання інфраструктуры нафтаправода на тэрыторыі Украіны ў выніку расійскай атакі. Аднак Орбан вінаваціць украінскі бок у прыпыненні паставак.
Калас таксама паведаміла, што сёння будуць абмяркоўвацца яе прапановы па перамоўнай пазіцыі ў дачыненні да Расіі.
“Цалкам відавочна, што да гэтага часу ціск на Украіну ў кантэксце мірных перамоў аказваўся, але відавочна, што ціск павінен аказвацца і на расійскі бок, паколькі ён з’яўляецца агрэсарам у гэтай вайне, і калі мы хочам, каб гэтыя войны спыніліся, калі мы не хочам, каб гэта зайшло далей, нам таксама неабходныя саступкі з боку Расіі”, — сказала яна.
Яшчэ адным пунктам украінскага парадку дня пасяджэння будзе крэдыт у 90 млрд еўра.
