Пазітыўным вынікам года для беларускай прамысловасці стане захаванне аб’ёмаў вытворчасці на ўзроўні 2025 года. Рост выпуску магчымы толькі пры ўмове ўсплёску попыту ў Расіі. Пра гэта гаворыцца ў экспрэс-аналізе работы беларускай эканомікі ў студзені, падрыхтаваным экспертамі MacroBy.
“У цэлым узровень складскіх запасаў заставаўся максімальным у XXI ст., сігналізуючы пра стрыманы попыт на беларускія тавары. У I квартале 2026 года аб’ём прамысловай вытворчасці застанецца ніжэй паказчыка папярэдняга года на 3–5%. З улікам рэкорднага аб’ёму запасаў і рэсурсных абмежаванняў пазітыўным вынікам бягучага года для прамысловасці стане захаванне вытворчасці на ўзроўні 2025 года.
Мінімальны рост выпуску ў сектары (у тым ліку ў апрацоўчых галінах) можна чакаць пры ўмове прыкметнага павышэння попыту на расійскім рынку. У цяперашні час значнае ўзмацненне эканамічнай актыўнасці ў Расіі не з’яўляецца перадумовай для базавага сцэнарыя, аднак верагоднасць рэалізацыі падобнай пазітыўнай рызыкі з’яўляецца адчувальнай”, — гаворыцца ў публікацыі.
Нагадаем, у студзені аб’ём вытворчасці ў прамысловасці скараціўся на 3,4%. Асноўны ўнёсак унеслі апрацоўчыя галіны, лічаць у MacroBy. Эксперты ўказваюць на спад у металургіі, хімічнай прамысловасці, выпуску будаўнічых матэрыялаў, машынабудаванні, дрэваапрацоўцы і лёгкай прамысловасці. Яны адзначаюць, што часткова зніжэнне вытворчасці насіла карэкцыйны характар пасля павелічэння продажаў на расійскім рынку ў снежні мінулага года перад доўгімі выхаднымі і павышэннем ПДВ у РФ.
У цэлым у студзені ВУП знізіўся на 1,2% у параўнанні з аналагічным месяцам мінулага года. Падзенне валавога ўнутранага прадукту ў параўнанні са снежнем аўтары публікацыі ацэньваюць у 1,4%.
“Істотна паўплываў на дынаміку ВУП кліматычны фактар: самы халодны студзень з 2010 года прывёў да павелічэння энергегенерацыі, але пры гэтым негатыўна ўздзейнічаў на інвестыцыйную актыўнасць (асабліва ў будаўніцтве), здабыўны сектар, выпуск шэрагу перапрацоўчых галін, грамадскае харчаванне і, верагодна, некаторыя сектары паслуг”, — дадаюць яны.
У MacroBy мяркуюць, што ў першым квартале ВУП будзе на ўзроўні леташняга, альбо крыху ніжэй. Па выніках года чакаецца невялікі рост у 0,5–1,5%.