Міністр замежных спраў Беларусі Максім Рыжанкоў лічыць, што Еўрасаюз шукае спосабы нармалізаваць адносіны з Беларуссю, але пакуль не адрэагаваў на вызваленне часткі палітвязняў у Беларусі. Пра гэта ён заявіў у эфіры тэлеканала «Беларусь 1» 9 сакавіка.
На пытанне пра перспектывы супрацоўніцтва з ЕС, калі з Беларусі здымуць санкцыі, Рыжанкоў адказаў, што «надзея заўсёды ёсць».
«Мы бачым, маючы інфармацыю з краін Захаду, Еўрасаюза, перш за ўсё, што менталітэт у іх палітычных элітах таксама змяшчаецца ў бок пошуку шляхоў нармалізацыі з Беларуссю.
Шмат проста засталося ва ўладзе ў гэтых краінах тых людзей, якія былі архітэктарамі гэтай неўтаймаванай санкцыйнай палітыкі ў дачыненні да Беларусі і Расіі», — заявіў Рыжанкоў.
На думку кіраўніка беларускага МЗС, санкцыі ў дачыненні да Беларусі не прынеслі вынікаў, і ЕС гэта разумее, але не можа прызнаць памылку.
«Палітычны лад у Беларусі і Расіі не змяніўся. Улада толькі яшчэ больш кансалідавалася вакол сваіх лідараў і вакол тых грамадскіх аб’яднанняў, якія сфармавалі базіс увогуле грамадскага развіцця дзяржаў.
І на сённяшні момант бумерангам гэтыя санкцыі больш б’юць па самой Еўропе, вось. Але ўстаць сёння і сказаць: «Мы былі не правы. Давайце працаваць з Беларуссю», — ну вось не кожны сабе палітык далёка ў Еўрапейскім Саюзе можа дазволіць. Таму што яму ж тут жа прад’явяць: «Дык скажыце, а пяць гадоў гэтых, вось шосты год, дык а выкінутыя былі гады, якія прывялі да эканамічных нейкіх праблем для Еўрапейскага Саюза, якія з’яўляліся вельмі сур’ёзнай праблемай для грамадзян па абодва бакі мяжы, разрывалі многія мультыкультурныя, гуманітарныя сувязі». Уся гэтая палітыка перш за ўсё яна шкодная для краін Еўрапейскага Саюза. Адказваць трэба камусьці», — лічыць Рыжанкоў.
Беларусь вызваліла некаторых палітвязняў і цяпер чакае рэакцыі ад ЕС, заявіў Рыжанкоў.
«І таму вось і гучаць такія заклікі. «Ведаеце, вы ў Беларусі нешта вось зробіце большае, што вы робіце, ну там нібыта ў гуманітарных нейкіх каардынатах, каб нам захаваць твар там у сябе перад нашымі выбаршчыкамі і сказаць: «Так, Беларусь жа нешта зрабіла».
Дык робіцца нешта. Вы хацелі, каб нейкія людзі выйшлі, значыць, на свабоду, якія ледзь не прывялі да калапсу тут сітуацыю ў нашай краіне. Ну іх вось выпусцілі. Ну давайце, дзе ваша рэакцыя на вось гэтыя вось гуманітарныя крокі прэзідэнта нашага? Іх няма. Вы, кажаце, нешта яшчэ.
Ну, хлопцы, так не бывае. І акрамя таго, калі гэта супрацоўніцтва будзе або павінна насіць узаемавыгадны характар, ну давайце разам крокі нейкія рабіць. Не бывае вось гэтая мантра: «Вы павінны, вы павінны, вы павінны», — сказаў міністр.
Рыжанкоў падкрэсліў, што Беларусь нікому нічога не павінна і добра сябе адчувае, нарошчваючы супрацоўніцтва з Расіяй, Кітаем, Іранам, Блізкім Усходам і Афрыкай.
«Я скажу, што на працягу гэтых шасці гадоў мы пераарыентавалі практычна ўвесь асноўны наш гандаль. Мы не страцілі нічога ў экспарце. Кожны год гэта прырост, за пяцігодку, па-мойму, каля 40% і далей ідзе прырост. Значыць, мы стварылі сваю тэхналагічную бяспеку. Мы перасталі залежаць ад Еўрапейскага Саюза», — адзначыў Рыжанкоў.
Адмовіўшыся ад расійскіх энерганосьбітаў і беларускіх прадуктаў, Еўрасаюз трапіў у залежнасць ад ЗША, лічыць кіраўнік МЗС Беларусі.
«Вось таму мы пакуль чакаем, лічачы ўсю гэтую палітыку Еўрапейскага Саюза ўвогуле самаізаляцыяй. Калі паглядзець на межы Еўрапейскага Саюза, то мала дзе ёсць нейкі кавалачак гэтай мяжы, дзе няма баявых дзеянняў або дзе ўвогуле ёсць нейкія стабільныя краіны, праз якія краіны Еўрапейскага Саюза могуць мець зносіны з усім астатнім светам», — заявіў Рыжанкоў.
Міністр адзначыў, што канфлікт на Блізкім Усходзе нясе катастрафічныя наступствы для ЕС, і заклікаў успомніць «стабільную дзяржаву Беларусь».
«Самы час ім апамятацца і ўспомніць, што тут ёсць стабільная дзяржава Беларусь, ёсць вось гэты кавалак мяжы, праз які далей на Расію і да Кітая, да Паўднёва-Усходняй Азіі. Але пакуль вось такія палітыкі — вось народы Еўрапейскага Саюза з’яўляюцца іх закладнікамі, за выключэннем, вядома, некалькіх краін, з якімі мы вельмі стабільна і дынамічна развіваем адносіны, як вось Венгрыя, Славакія, напрыклад», — сказаў Рыжанкоў.
Паводле даных праваабаронцаў, з 2020 года ў Беларусі «памілавалі» 605 палітычных зняволеных і за той жа перыяд статус палітвязня атрымалі 4499 чалавек. Частка з “памілаваных” была прымусова выдварана з Беларусі, некаторыя без дакументаў. За кратамі застаюцца больш за 1000 палітвязняў.
