Цягніковы дыспетчар БЧ абвінавачваецца ў атрыманні хабару на суму больш за 2800 еўра за арганізацыю стаянак грузавых цягнікоў, падчас якіх у вагоны загружаліся несанкцыянаваныя тавары.
Паводле матэрыялаў справы, з мая 2023 года абвінавачаны кіраваў рухам цягнікоў на абслугоўваемым дыспетчарскім участку, планаваў і арганізоўваў пропуск цягнікоў, даводзіў станцыям інфармацыю пра рух саставаў, забяспечваў кантроль за іх работай па прыёме, фарміраванні і адпраўленні цягнікоў.
«Ведаючы пра графік руху і план фарміравання саставаў, ён падчас асабістай сустрэчы з раней не знаёмым яму 33-гадовым мужчынам дамовіўся пра атрыманне ў якасці хабару грошай за арганізацыю неабходных таму стаянак на адной з чыгуначных станцый Мінскага раёна», – паведамляе пракуратура Мінскай вобласці.
З 27 лютага па 5 лістапада 2025 года дыспетчар атрымаў больш за 2800 еўра хабару за «спрыяльнае вырашэнне пытанняў», у тым ліку за звесткі пра стаянку і адпраўленне цягнікоў на пэўнай станцыі. За час стаянкі ў кантэйнеры загружаўся несанкцыянаваны тавар.
Падчас папярэдняга следства абвінавачаны добраахвотна кампенсаваў даход, атрыманы злачынным шляхам. Ён знаходзіцца пад вартай.
Раней Супольнасць чыгуначнікаў Беларусі паведамляла пра адну са схем кантрабанды беларускіх цыгарэт у Еўрасаюз. Іх закідвалі ў кантэйнеры, якія ішлі з Кітая ў ЕС.
Таксама паведамлялася пра затрыманне на пачатку лістапада 2025 года цягніковага дыспетчара Андрэя Гаўрылюка. Паводле інфармацыі СЧБ, яго абвінавачвалі ў атрыманні хабару за схему з кантрабандай і ў дзяржаўнай здрадзе.
