Ініцыятыва BELPOL пачала публікаваць спіс беларускіх арганізацый, якія падтрымліваюць расійскую агрэсію супраць Украіны. Апублікавана першая частка спісу.
“У спіс уключаны прадпрыемствы і структуры, па якіх завершаны збор доказаў. Уся сабраная інфармацыя ўжо перададзена партнёрам у Еўрапейскім саюзе, ЗША, Канадзе, Вялікабрытаніі і Украіне — для ініцыявання санкцыйных працэдур і прыняцця абмежавальных мер.
Гаворка ідзе не толькі пра вытворцаў зброі і боепрыпасаў для расійскага ваенна-прамысловага комплексу. У пералік таксама ўвайшлі арганізацыі, задзейнічаныя ў схемах абыходу санкцый — яны забяспечваюць пастаўкі камплектуючых, лагістыку і фінансавае суправаджэнне для прадпрыемстваў, якія выпускаюць узбраенне для краіны-агрэсара. Важна падкрэсліць: гэтыя структуры цалкам усведамляюць сваю ролю ў падобных аперацыях”, – гаворыцца ў заяве BELPOL.
У спіс таксама ўключаюцца банкі, праз якія ідуць разлікі за дэталі, тэхналогіі, фінансуецца стварэнне і пашырэнне ваеннай вытворчасці. Акрамя таго, у спіс уключаны арганізацыі, якія забяспечвалі фарміраванне наступальнай групоўкі расійскіх войскаў і ўварванне ва Украіну з тэрыторыі Беларусі, уключаючы перавозку асабовага складу, тэхнікі і боепрыпасаў. Сёння яны таксама працягваюць транспартаванне ваенных грузаў.
“Зняцце санкцый з кампаній і банкаў, якія падтрымліваюць пастаўкі ўзбраення ў Расію, фактычна азначае садзейнічанне агрэсару. Гэта не нейтральнае эканамічнае рашэнне, а прамы ўнёсак у працяг вайны і новых ахвяр”, – падкрэслілі ў BELPOL.
У першую частку спісу BELPOL уключаны 120 арганізацый, у тым ліку прадпрыемствы Дзяржкамваенпрама, найбуйнейшыя прамысловыя прадпрыемствы, некаторыя банкі і інш.
