Прадстаўніца Аб’яднанага пераходнага кабінета Беларусі па маладзёжнай палітыцы Маргарыта Ворыхава ў эфіры «Еўрарадыё» расказала пра прапанову стварыць спецыяльную «візу маладога беларуса» для грамадзян ва ўзросце ад 18 да 30 гадоў.
Паводле яе слоў, ідэя спрашчэння візавага доступу для беларусаў прасоўваецца ўжо некалькі гадоў, аднак у адказ гучалі асцярогі наконт бяспекі і неабходнасці дадатковых праверак. Таму было вырашана засяродзіцца на моладзі як групе, найбольш арыентаванай на Еўропу.
Ворыхава лічыць, што сярод маладых людзей менш рызыкі быць «афіляванымі з КДБ або іншымі структурамі» з прычыны ўзросту.
Прапануецца выдаваць такую візу па спрошчанай працэдуры — не толькі для тых, хто вымушаны пакінуць Беларусь з-за рэпрэсій, але і для тых, хто проста хоча пазнаёміцца з Еўропай і вярнуцца дадому.
Такім чынам, на думку палітыка, удасца разбіць наратывы прапаганды пра «дрэнную Еўропу».
«Гэта можна зрабіць толькі калі ты знаходзішся там целам, адчуваеш, што там свабода, і калі ты вяртаешся ў Беларусь і потым можаш расказаць сваім сябрам і сям’і і такім чынам супрацьдзейнічаць прапагандзе», — заявіла Ворыхава.
