Украінскі алігарх Дзмітрый Фірташ змог пазбегнуць экстрадыцыі з Аўстрыі ў ЗША дзякуючы статусу беларускага дыпламата і імунітэту ад крымінальнага пераследу. Суд у Вене паставіў кропку ў разглядзе, які працягваўся з 2014 года.
У 2024 годзе Вышэйшы зямельны суд Вены пастанавіў не экстрадаваць Фірташа ў ЗША, бо ён валодаў імунітэтам ад крымінальнага пераследу як беларускі дыпламат. З 2021 года алігарх значыцца дарадцам пастаяннага прадстаўніцтва Беларусі пры міжнародных арганізацыях у Вене. У тым жа годзе ў штаб-кватэру UNIDO (Арганізацыі Аб’яднаных Нацый па прамысловым развіцці) была перададзена нота аб дэлегаванні Фірташа як прадстаўніка пры ААН па прамысловым развіцці.
Пракуратура Вены спрабавала аспрэчыць гэтае рашэнне. Суддзя даў пракуратуры чатыры тыдні, а не прадугледжаныя заканадаўствам дзве, каб аспрэчыць рашэнне, але пазней Вярхоўны суд прызнаў такое падаўжэнне тэрмінаў незаконным. У выніку пракуратура прапусціла тэрмін падачы апеляцыі ў лістападзе 2024 года, піша Die Presse.
Рашэнне суда ўступіла ў сілу ў снежні 2025 года. МЗС Аўстрыі і UNIDO адмовілі Фірташу ў фармальнай акрэдытацыі, суд зыходзіў з таго, што накіраваныя ў 2021 годзе ноты пасольства Беларусі, у якіх Фірташ быў прызначаны дарадцам Пастаяннага прадстаўніцтва Беларусі пры UNIDO, аўтаматычна далі яму дыпламатычны імунітэт. У сваім рашэнні суддзя спасылаўся на «замацаваны ў Канстытуцыі прынцып падзелу судовай і выканаўчай улады», сцвярджаючы, што суд юрыдычна не абавязаны прытрымлівацца пазіцыі міністэрства.
Пракуратура спрабавала змяніць тэрмін падачы апеляцыі, але 6 сакавіка Вышэйшы зямельны суд Вены адмовіў у задавальненні хадайніцтва.
Дзмітрыя Фірташа затрымалі ў Аўстрыі ў 2014 годзе па запыце ЗША, але вызвалілі пад заклад. З таго часу Фірташ аспрэчвае экстрадыцыю ў ЗША. Злучаныя Штаты абвінавачваюць яго ў дачы хабараў у Індыі для атрымання дазволу на здабычу тытанавай сыравіны.
