(Абноўлена) Злучаныя Штаты Амерыкі захапілі нафтаналіўны танкер Olina ў Карыбскім моры ля берагоў Трынідада, паведамляе Паўднёвае камандаванне арміі ЗША.
“У ходзе аперацыі, праведзенай да світанку, марскія пяхотнікі і маракі з Аб’яднанай аператыўнай групы Southern Spear («Паўднёвая дзіда») у каардынацыі з Міністэрствам унутранай бяспекі ЗША выйшлі з борта авіяносца Gerald R. Ford і без інцыдэнтаў затрымалі танкер Olina ў Карыбскім моры”, — гаворыцца ў прэс-рэлізе.
“Падобныя затрыманні ажыццяўляюцца пры поўнай падтрымцы Амфібійнай гатовай групы ВМС ЗША, уключаючы баявыя платформы USS Iwo Jima, USS San Antonio і USS Fort Lauderdale. Аперацыя Southern Spear Міністэрства абароны ЗША няўхільна выконвае сваю місію па абароне нашай радзімы, спыняючы незаконную дзейнасць і аднаўляючы бяспеку ў Заходнім паўшар’і”, — дадалі вайскоўцы.
Once again, our joint interagency forces sent a clear message this morning: “there is no safe haven for criminals.”
In a pre-dawn action, Marines and Sailors from Joint Task Force Southern Spear, in coordination with the Department of Homeland Security, launched from the USS… pic.twitter.com/1ASoajGVHG
— U.S. Southern Command (@Southcom) January 9, 2026
Гэта пяты падобны выпадак затрымання суднаў за апошнія тыдні ў межах намаганняў Вашынгтона па кантролі над экспартам венесуэльскай нафты, піша Reuters са спасылкай на афіцыйнага прадстаўніка ЗША.
Olina, які, згодна з публічнай базай даных Equasis, хадзіў пад ілжывым сцягам Тымора-Лешці, раней выйшаў з Венесуэлы і вярнуўся ў рэгіён перад сённяшняй аперацыяй па захопе. Пра гэта агенцтву паведаміла крыніца ў суднаходстве, знаёмая з сітуацыяй.
