The Wall Street Journal расказала падрабязнасці аперацыі па ліквідацыі вярхоўнага кіраўніка Ірана Алі Хаменеі. Ён быў забіты 28 лютага.
Як піша выданне, удар па рэзідэнцыі быў першым у ходзе аперацыі ЗША і Ізраіля супраць Ірана.
Хаменеі знаходзіўся пад назіраннем ізраільскай разведкі на працягу многіх гадоў. Для адсочвання яго перамяшчэнняў і вышэйшага кіраўніцтва Ірана выкарыстоўваўся перахоп тэлефонных размоў, якія ў тым ліку апрацоўваліся з дапамогай ШІ. Таксама вялася вярбоўка агентаў, ізраільскія разведчыкі ўзломвалі камеры відэаназірання на дарогах іранскай сталіцы для атрымання інфармацыі ў рэжыме рэальнага часу.
У суботу стала вядома пра сустрэчу іранскага кіраўніцтва, а таксама пра тое, што Хаменеі будзе знаходзіцца ў сваёй рэзідэнцыі. Удар наносіўся першым, да таго як будзе атакавана іранская СПА. Атакі на яе маглі прывесці да таго, што Хаменеі мог схавацца ў больш бяспечным месцы. Адзначаецца, што звычайна вярхоўны лідар Ірана на ноч адпраўляўся ў сховішча, бо раней ізраільскія ўдары часта наносіліся ўначы.
Каля 9:40 знішчальнікі F-15 выпусцілі дзясяткі боепрыпасаў, уключаючы ракеты Blue Sparrow. Яны запускаліся з вялікай адлегласці. Гэтыя ракеты выходзяць за межы атмасферы, каб пасля ўпасці на аб’ект паражэння.
Ужо пасля атакі на рэзідэнцыю Хаменэі ЗША і Ізраіль пачалі наносіць удары па іранскай СПА і іншай ваеннай інфраструктуры. ВМС ЗША ўжылі “Томагавкі” і бартовыя комплексы HIMARS па Паўднёвым Іране.
