Прэм’ер-міністр Беларусі Аляксандр Турчын падпісаў пастанову Саўміна аб устанаўленні новых цэн на газ, а таксама тарыфаў на электрычную і цеплавую энергію для насельніцтва. Дакумент прадугледжвае павышэнне цэн і тарыфаў з 1 сакавіка 2026 года, паведамляе прэс-служба беларускага ўрада.
Рост плацяжоў разлічаны зыходзячы з размеркавання павелічэння па тыповай кватэры ў памеры 22,5 рубля, або 0,5 базавай велічыні, паміж усімі жыллёва-камунальнымі паслугамі. Параметры вызначаны ўказам Аляксандра Лукашэнкі ад 23 студзеня 2026 года №33 «Аб устанаўленні тарыфаў для насельніцтва ў сферы жыллёва-камунальнай гаспадаркі на 2026 год».
Цэны на газ вырастуць на 7,07%, што прывядзе да павелічэння плацяжу ў сярэднім на 0,93 рубля.
Тарыфы на электраэнергію павысяцца на 7%. Плацеж павялічыцца на 2,99 рубля.
Тарыфы на цеплавую энергію будуць павышаны з 1 чэрвеня 2026 года на 7,3%. У выніку плацяжы ўзрастуць на 3,12 рубля, у тым ліку за ацяпленне — на 2,6 рубля, за гарачае водазабеспячэнне — на 0,53 рубля.
Таксама падаражэе звадкаваны газ у балонах: кошт аднаго балона павялічыцца на 1,7 рубля.
Нагадаем, раней Лукашэнка вырашыў перанесці тэрмін павышэння тарыфаў на жыллёва-камунальныя паслугі для насельніцтва з 1 студзеня на 1 сакавіка 2026 года. Паводле інфармацыі яго прэс-службы, з адпаведнай прапановай да яго звярнуўся ўрад, і Лукашэнка яе падтрымаў. Паведамлялася, што “рашэнне прынята зыходзячы з падыходаў па недапушчэнні дадатковай нагрузкі для грамадзян пры аплаце за ЖКП».
