У Мінску спынена дзейнасць махлярскіх кол-цэнтраў. Як паведамілі ў Следчым камітэце, сумесна з ГУБАЗіК МУС праведзены шэраг затрыманняў асоб, датычных да дзейнасці міжнароднай арганізаванай злачыннай групы.
Паведамляецца, што зламыснікі стварылі больш за 800 фальшывых сайтаў, на якія заваблівалі людзей абяцаннямі высокіх даходаў ад інвестыцый. Фінансавыя кампаніі, у якія прапаноўвалася ўкладацца, не існавалі. На сайтах збіраліся дадзеныя грамадзян. У далейшым з імі звязваліся “фінансавыя спецыялісты” і ўгаворвалі пераводзіць грошы на фіктыўныя рахункі. Імітаваўся паспяховая гандаль, і кліенты ўносілі ўсё новыя сумы.
Падрабязнасці справы сілавікі абяцаюць расказаць сёння на прэс-канферэнцыі.
У роліку-анонсе таксама дэманструюцца фрагменты паказанняў двух затрыманых
“Кампанія займалася прадастаўленнем брокерскіх паслуг. Загадзя разумелі, што гэта не брокерскія паслугі. Загадзя разумелі, што кампанія падманвае людзей. З боку кампаніі працавалі праз дадатак, які даваў магчымасць тэлефанаваць на іншыя нумары. Адпаведна, людзі, якім мы тэлефанавалі, у адказ патэлефанаваць не маглі. Аднабаковая сувязь”, — кажа адзін малады чалавек.
У выпадку другога прадстаўлены цэлы дыялог:
— Як даўно вы працуеце?
— Прыкладна тры гады.
— Калі сталі разумець, што грошы кліентам не вяртаюцца?
— На месяц пяты-шосты.
— То-бок вы ўсведамлялі, што грашовыя сродкі грамадзян, якія яны інвестуюць, не вяртаюцца, але тым не менш працягвалі сваю дзейнасць?
— Так.
— Чаму працягвалі?
— Выгадна было ў плане фінансавых магчымасцей.
Таксама, мяркуючы па кадрах, у кол-цэнтрах мог выкарыстоўвацца паліграф для тэставання супрацоўнікаў.
