У горадзе Бяла-Падляска на ўсходзе Польшчы раніцай 15 чэрвеня быў застрэлены 44-гадовы грамадзянін Расіі. Як паведаміла мясцовая паліцыя, ён быў забіты некалькімі стрэламі з агнястрэльнай зброі на вуліцы Каралевы Ядвігі.
Таксама паведамлялася, што вядуцца дзеянні па ўстанаўленні і затрыманні зламысніка. У горадзе прынятыя меры па забеспячэнні бяспекі ў дзіцячых садах і школах.
Як паведамляе тэлеграм-канал DzikMedia, забойцу на месца злачынства прывёз таксіст з Беларусі. Яму пагражалі пісталетам, і мужчына паспрабаваў уцячы на тэрыторыю беларускага консульства.
У сетцы з’явілася відэа з затрыманнем чалавека каля консульства. Каго менавіта затрымалі — невядома.
Як паведамляюць СМІ, забіты расіянін — мастак-карыкатурыст Сямён Скрэпецкі (сапраўднае імя — Роберт Кузаўкоў). З 2021 года жыў у Польшчы праз пагрозы палітычнага пераследу ў Расіі. Адна з яго апошніх акцый — адзіночны пікет насупраць расійскай амбасады ў Берліне. Ён прыйшоў туды з карцінай, на якой былі намаляваныя Іосіф Сталін і Уладзімір Пуцін. У апошнім допісе ў Telegram Скрэпецкі апублікаваў пагрозы, якія атрымліваў.
