4 чэрвеня прэм’ер-міністр Беларусі Аляксандр Турчын пачаў афіцыйны візіт у Кыргызстан.
Першы дзень візіту ён пачаў з наведвання смеццесартавальнай станцыі. На станцыі працуе тэхніка беларускай кампаніі «Сіфанія-Экатэхніка» — вытворцы комплекснага абсталявання для сартавання і глыбокай перапрацоўкі адходаў.
У 2022 годзе «Сіфанія-Экатэхніка» падпісала дамову на 1,35 млн долараў з камунальным прадпрыемствам «Каракольскі камбінат добраўпарадкавання і санітарнай ачысткі». У Караколе пачаў працу прыёмна-сартавальны комплекс прадукцыйнасцю 20 000 тон цвёрдых камунальных адходаў у год. Запушчаны сем вытворчых ліній па вырабе прамысловых тавараў з перапрацаваных адходаў, паведамляе прэс-служба беларускага ўрада.
У 2025 годзе беларуская кампанія выйграла тэндар на закупку для Бішкека абсталявання смеццесартавальнай станцыі прадукцыйнасцю па сартаванні 100 000 тон цвёрдых камунальных адходаў у год і лініі па вытворчасці палімерна-пясчаных вырабаў. Смеццесартавальная станцыя была ўведзена ў эксплуатацыю ў снежні 2025 года.
Беларуская дэлегацыя таксама наведала экатэхналагічны завод па выпрацоўцы электраэнергіі шляхам утылізацыі цвёрдых бытавых адходаў у Бішкеку. Праект рэалізаваны на кітайскія інвестыцыі. Паводле папярэдніх ацэнак, агульны аб’ём укладанняў склаў 95 млн долараў.
