Міністр замежных спраў, віцэ-прэм’ер Польшчы Радаслаў Сікорскі спадзяецца, што пасля публічных папярэджанняў прэзідэнт РФ Уладзімір Пуцін не пойдзе на правакацыі супраць Польшчы або краін Балтыі. Пра гэта ён заявіў у інтэрв’ю CNN.
«Расія не можа атакаваць НАТА сілай. У яе няма неабходных сіл. Пакуль Украіна мужна супраціўляецца, Пуцін не можа ўварвацца нават у краіны Балтыі. Мы б убачылі гэта загадзя, як мы бачылі, што расійскія войскі збіраліся вакол Украіны ў чаканні ўварвання.
Але на што яны здольныя, дык гэта на свайго роду правакацыю, выкарыстоўваючы правакацыі і беспілотнікі, магчыма, украінскія беспілотнікі, а затым робячы выгляд, што адкажуць на нашу фальшывую, неіснуючую атаку. Яны ўжо гулялі ў такія гульні. І мы павінны быць гатовыя. Мы павінны сказаць ім, і менавіта гэта мы і робім, што мы ведаем: яны замышляюць нешта нядобрае.
Памятайце, падчас папярэдняй адміністрацыі, да ўварвання ва Украіну, ЗША публічна папярэджвалі, што Расія мае намер сфабрыкаваць нагоду для вайны, ілжывую прычыну для вайны. І гэта прадухіліла рэальныя дзеянні расіян.
Таму я спадзяюся, што гэтыя папярэджанні азначаюць, што Пуцін не націсне кнопку правакацыі», — сказаў ён.
Нагадаем, на мінулым тыдні брытанскія і польскія выданні падрыхтавалі артыкулы пра магчымыя сцэнары правакацый з боку Расіі ў дачыненні да Польшчы. Выкладзеныя са спасылкай на ваенныя і дыпламатычныя крыніцы сцэнары прадугледжвалі задзейнічанне расійскіх або беларускіх вайскоўцаў, беспілотнікаў.
Адзін з найбольш радыкальных сцэнароў заключаўся ў тым, што расійскія або беларускія вайскоўцы пад выглядам выратавальнай аперацыі апынуцца на тэрыторыі Польшчы, адкуль яны будуць выведзеныя не ў выніку прымянення сілы, а ў выніку перамоў, якія пачнуцца пад ціскам ЗША. У рамках гэтых перамоў РФ, у тым ліку, будзе патрабаваць скарачэння падтрымкі Украіны.
