Аляксандр Лукашэнка сёння прыняў з дакладам свайго сына, прэзідэнта Нацыянальнага алімпійскага камітэта Віктара Лукашэнку.
«Два пытанні, што датычыцца спорту. Унутраная сітуацыя, асабліва пасля апошняй нарады. Гэта не толькі хакей, натуральна. І што ў нас на знешнім трэку атрымліваецца? Хто там нас дагэтуль не прызнае, хто прызнаў і гэтак далей», — сказаў Аляксандр Лукашэнка, перадае яго прэс-служба.
Нагадаем, нядаўна ў яго адбылася нарада, фармальна прысвечаная далейшаму лёсу хакейнага «Дынама-Мінск», аднак падчас мерапрыемства Лукашэнка зладзіў разнос і спартыўным функцыянерам, якія адказваюць за іншыя кірункі.
Лукашэнка пацікавіўся, як працуе «кіруючая тройка» ў спорце, якая, паводле яго слоў, уключае віцэ-прэм’ера Наталлю Пяткевіч, міністра спорту Сяргея Кавальчука і самога Віктара Лукашэнку.
«Наколькі гэтая тройка працаздольная? Якая ў нас тут сітуацыя?» — спытаў ён.
Сённяшні даклад таксама датычыўся супрацоўніцтва з краінамі Персідскага заліва і часткова Афрыкай. Гаворка ідзе пра персанальныя задачы Віктара Лукашэнкі на міжнародным узроўні.
«У тым ліку дзяржаўнае пытанне, якое вісіць на табе, — гэта Аман, Аб’яднаныя Арабскія Эміраты, Афрыка часткова. Як мы там працуем, як прасоўваюцца праекты, пра якія мы гаварылі ў эканоміцы?» — спытаў ён.
