Міністэрства інфармацыі Беларусі абнавіла свой спіс “экстрэмісцкіх матэрыялаў”.
У яго трапілі сайт і сацсеткі праваабарончай арганізацыі Human Constanta. Рашэнне аб прызнанні іх інфармацыйнай прадукцыі экстрэмісцкай 24 лютага прыняў суд Чашніцкага раёна. У пералік унесены акаўнты ў Facebook, “Вконтакте”, Instagram, Х, YouTube.
Акрамя таго, спіс папоўнілі:
- акаўнт у Instagram “belarus_about”,
- відэа на YouTube “Пуцін рыхтуе захоп Беларусі — Лукашэнка пагадзіўся? Што адбываецца. Дземчанка”,
- акаўнты ў TikTok “nna”, “Беларусь | Без фільтраў”
- Telegram-каналы “Чат выбарчай акругі №100.” і “Кантроль акупантаў і аўтазакаў. Мінск”
Трэба адзначыць, што акаўнт у TikTok “Беларусь | Без фільтраў” уключаны ў спіс у чацвёрты раз. 13 лютага яго прызнаў экстрэмісцкім суд Мінскага раёна, 18 лютага з крыху іншым напісаннем назвы — суд Калінкавіцкага раёна, 20 лютага ў якасці “адкрытай групы” — суд Ельскага раёна, і, нарэшце, 25 лютага — суд Шклоўскага раёна.
Нагадаем, абвінавачанні ў экстрэмізме выкарыстоўваюцца беларускімі ўладамі для пераследу палітычных апанентаў і іншадумства ў цэлым.
