Міністр замежных спраў Беларусі Максім Рыжанкоў абмеркаваў сітуацыю на Блізкім Усходзе з міністрам замежных спраў Амана Бадрам бін Хамадам бін Хамудам Аль-Бусаідзі. Размова адбылася па даручэнні Аляксандра Лукашэнкі, паведамляе прэс-служба беларускага МЗС.
Рыжанкоў выказаў падтрымку намаганням Амана «па ўсталяванні трывалага міру ў рэгіёне, а таксама ўсім прадпрымаемым ім пасярэдніцкім крокам».
Кіраўнік МЗС Амана праінфармаваў свайго беларускага калегу пра развіццё сітуацыі ў зоне канфлікту.
«Суразмоўцы падкрэслілі безальтэрнатыўнасць дыпламатычнага ўрэгулявання сітуацыі. З вялікай заклапочанасцю быў адзначаны працяг гібелі мірных грамадзян і разбурэнне грамадзянскай інфраструктуры. Міністры выказаліся за як мага хутчэйшае спыненне ўсіх гвалтоўных дзеянняў», — гаворыцца ў прэс-рэлізе МЗС Беларусі.
Суразмоўцы адзначылі, што ўсе ўцягнутыя бакі павінны вярнуцца да ўрэгулявання рознагалоссяў мірнымі сродкамі для аднаўлення стабільнасці і бяспекі ў рэгіёне.
Рыжанкоў заявіў, што Беларусь гатовая прыкладаць усе неабходныя намаганні, якія будуць спрыяць дээскалацыі канфлікту.
Бакі таксама пацвердзілі дружалюбны характар адносін паміж народамі Беларусі і Амана, «аснову якіх закладвае шчырая, узаемная павага і падтрымка, што склаліся паміж лідарамі дзвюх краін».
Аляксандр Лукашэнка разам з сынамі Віктарам і Мікалаем знаходзіўся з працяглым візітам у Амане ў лістападзе-снежні 2025 года. Па выніках візіту ён заявіў пра планы стварыць сумесны інвестыцыйны фонд, пабудаваць новы ЦКК у Беларусі, а таксама лагістычны хаб і беларускі курорт у Амане.
