Прэм’ер-міністр Літвы Інга Ругінене заявіла, што мінулы год стаў рэкордным па выяўленні кантрабанды, а ў 2026 годзе ўлады разлічваюць перасягнуць гэты вынік. Паводле яе слоў, сілавыя і кантрольныя службы прадэманстравалі высокую эфектыўнасць і хуткасць рэагавання, піша LRT.
Выступаючы перад журналістамі ў сераду ва ўрадзе, Ругінене адзначыла, што паказчыкі канфіскацый у 2025 годзе былі беспрэцэдэнтнымі. Яна выказала падзяку профільным ведамствам і падкрэсліла, што разлічвае на гэтак жа прыкметныя вынікі і ў бягучым годзе.
«Мы не спынімся. Вынік напрыканцы года быў вельмі добрым. Я рада і дзякую службам. Былі дасягнутыя сапраўды неардынарныя лічбы, я ўжо і не прыгадаю такіх канфіскацый і такой аператыўнасці. (…) Я дакладна ведаю, што ў службаў будзе больш шырокае бачанне гэтай сітуацыі, і вельмі спадзяюся, што мы зможам пахваліцца добрымі вынікамі і ў гэтым годзе», — заявіла прэм’ерка.
У той жа час кіраўніца ўрада заклікала не рабіць паспешлівых высноў пра змяншэнне колькасці кантрабандысцкіх паветраных шароў у апошнія тыдні. Паводле яе слоў, на сітуацыю паўплывалі адразу некалькі фактараў — святочны перыяд у Беларусі і Расіі, зменлівая ружа вятроў, а таксама вялікія снегапады, якія ўскладняюць як перакідку грузаў, так і іх выяўленне.
«Я нават не хачу ацэньваць змяншэнне колькасці шароў, бо, па-першае, гэта быў святочны перыяд — мы ўсе разумеем, што ў Расіі і Беларусі святочны перыяд працягваецца да 15 студзеня. Па-другое, быў зменлівы вецер — і спрыяльны, і неспрыяльны, які дзьме ў бок Беларусі, а не ў наш бок. (…) І па-трэцяе — выпаў снег, і яго даволі шмат», — сказала яна.
«Ёсць пэўныя фактары, якія не дазваляюць усебакова ацаніць усю сітуацыю. Для гэтага патрэбны больш працяглы перыяд, і мы ўсё яшчэ знаходзімся ў рэжыме пільнасці і вельмі асцярожна ацэньваем сітуацыю», — дадала Ругінене.
Паводле даных Службы аховы дзяржаўнай мяжы Літвы, у мінулым годзе было перахоплена 635 партый цыгарэт, дастаўленых з Беларусі з дапамогай паветраных шароў. Для параўнання: у 2024 годзе зафіксавана 226 такіх выпадкаў, у 2023-м — толькі некалькі, а ў 2022 годзе падобных фактаў не адзначалася ўвогуле.
Метэазонды ў 2025 годзе парушалі працу Вільнюскага аэрапорта больш за 300 разоў, закранулі 47 тысяч пасажыраў і прывялі да закрыцця аэрапортаў амаль на 60 гадзін у агульнай складанасці.
Нягледзячы на прыкметы зніжэння актыўнасці, міністр унутраных спраў Літвы Уладзіслаў Кандратовіч заявіў, што не бачыць падстаў для адмены рэжыму надзвычайнай сітуацыі дзяржаўнага ўзроўню, уведзенага месяц таму з-за пагрозы кантрабанды.
У 2025 годзе літоўскія памежнікі канфіскавалі больш за 4,4 млн пачак кантрабандных цыгарэт — гэта самы высокі паказчык за ўсю гісторыю службы з моманту аднаўлення незалежнасці краіны. У параўнанні з 2024 годам аб’ёмы затрыманняў выраслі больш як утрая.
Мінулы год стаў адметным і па іншым паказчыку: упершыню аб’ёмы нелегальных цыгарэт, якія спрабавалі ўвезці ў Літву з Латвіі, пераўзышлі пастаўкі з Беларусі — раней падобнай тэндэнцыі не фіксавалася.
