Прасяданне экспарту прамысловасці і маруджанне з прызнаннем лічбавага подпісу сёння назваў Аляксандр Лукашэнка сярод праблемных пытанняў у адносінах з РФ. Ён прыняў пасла Беларусі ў Маскве Аляксандра Рагожніка.
“Гаварыць пра тое, што расійскі напрамак для нас важны… Ну што паслу казаць пра гэта. Я вам казаў пры прызначэнні па гэтай тэматыцы. Ну а папрацаваўшы там, вы разумееце, што гэта наш асноўны напрамак. Нібыта ў цэлым мы там забяспечваем прырост. І ўлічваючы, шчыра кажучы, як у Беларусі і Расіі складаюцца справы, то 102,5% — пад 103% — гэта нібыта нядрэнна. Але план у нас быў 105%. Мы бачым праблемы. У нас прасяданне па прамысловасці. Ваша тэма, дарэчы, як былога міністра прамысловасці (былых жа не бывае)”, — сказаў Лукашэнка.
Ён таксама папрасіў яго далажыць пра сумесныя праекты ў РФ, у прыватнасці ў развіцці станкабудавання.
“Па-другое, як мяне інфармуюць, акрамя Мінпрама, новыя вытворчасці — якая сітуацыя тут? Гэта вельмі важна. Мы шмат гаворым цяпер пра станкабудаванне. Без яго ніякага развіцця быць не можа. А ў нас ёсць гэтая тэма, задзел добры, школа ёсць, кампетэнцыі. Мы гаворым пра авіябудаванне і многае-многае, і ВПК у тым ліку. Што вы бачыце тут? Якія недахопы?” — сказаў ён.
Лукашэнка адзначыў, што трэба нарошчваць прысутнасць на расійскім рынку паслуг.
“Рынак паслуг. Ды і вы прызнаеце, што трэба ў гэтым плане нам нарошчваць нашу прысутнасць у Расіі, тым больш, што такія магчымасці сёння запатрабаваныя ў Расійскай Федэрацыі. Нешта мы там затармазіліся з лічбавым подпісам. Якія праблемы? Для нас гэта дзверы па многіх напрамках у Расійскай Федэрацыі. Тым больш, што рашэнні нібыта ўжо прыняты. У чым тармажэнне? Пры сустрэчы з Уладзімірам Уладзіміравічам Пуціным мы абмяркуем гэтыя пытанні, калі там хтосьці тармазіць”, — працягнуў ён.
Яшчэ адной тэмай дакладу стала меркаванае будаўніцтва высакахуткаснай чыгуначнай магістралі.
“Далей, высакахуткасная магістраль, цягнік Масква — Мінск да Брэста. Для нас гэта вельмі важна. Вы як прамысловец што бачыце тут? Рэальна гэта, нерэальна? Тым больш, што гэты напрамак цяпер усходні, маскоўскі, перш за ўсё, сярод нашых людзей вельмі запатрабаваны. Ну і шэраг іншых пытанняў па пасольстве, па нашай прысутнасці ў Маскве і ў Расійскай Федэрацыі. Ваша ўражанне, ваша меркаванне?” — сказаў ён.
Рагожнік у сваю чаргу павіншаваў Лукашэнку з Новым годам, на што той назваў 2026 год вельмі важным.
“Пачынаецца вельмі важны для нас год. 2026 год мы праваліць ніяк не павінны. Гасподзь нас пашкадаваў: снег выпаў, пасевы прыкрыў (пасеялі нядрэнна, і ўсходы добрыя). Таму тут у нас больш-менш па ўсёй рэспубліцы. Засталося нам толькі сваю справу зрабіць. Таму новы год для нас — гэта пачатак новых спраў”, — сказаў ён.
