Прэзідэнт Расіі Уладзімір Пуцін заявіў, што прачытаў ліст Уладзіміра Зяленскага з прапановай аб асабістай сустрэчы. Ён назваў ліст хамскім, заявіў, што не бачыць сэнсу сустракацца, і звярнуўся да расійскіх вайскоўцаў з заклікам «Працуйце, браты».
Пытанне пра ліст задалі Пуціну падчас пленарнага пасяджэння на Пецярбургскім міжнародным эканамічным форуме 5 чэрвеня.
«Пяскоў учора паказаў мне ліст Зяленскага, я паглядзеў з раніцы гэтую паперку, падсунуў, я яе паглядзеў», — сказаў Пуцін.
У першую чаргу Пуцін адрэагаваў на згадку пра свой узрост і доўгае знаходжанне пры ўладзе.
«Па-першае, ён згадаў там, аўтар ліста, пра мой узрост. Што можна сказаць. Вядома, пра ўзрост павінны думаць усе. Але мне ўяўляецца, што ў маім узросце і многія іншыя палітычныя дзеячы ажыццяўляюць свае функцыі, і некаторыя старэйшыя за мяне. Галоўнае — гэта не ўзрост, хоць гэта важна, але галоўнае — гэта не ўзрост, а дзеяздольнасць і працаздольнасць», — заявіў прэзідэнт РФ.
Пуцін адзначыў, што не трэба баяцца ісці на выбары, і намякнуў, што выбары трэба правесці ва Украіне.
На прапанову Зяленскага ўключыць Еўропу ў працэс мірнага ўрэгулявання Пуцін адзначыў, што з перамоў не павінны выключацца ЗША.
«Цяпер аўтар таксама паказвае на тое, што не трэба прытрымлівацца дамоўленасцяў, якія былі дасягнутыя ў Анкарыджы. І больш за тое, трэба шукаць сапраўдных гарантаў магчымых дамоўленасцяў паміж Расіяй і Украінай, і шукаць іх трэба ў Еўропе.
Ну, напэўна, надзейныя гаранты ніколі не перашкодзяць. Але чаму адмаўляецца ў такой якасці амерыканскай адміністрацыі, прэзідэнту Трампу, мне не вельмі зразумела. Зброю хочуць атрымліваць ад ЗША, а бачыць ЗША і прэзідэнта Трампа ў якасці гарантаў чамусьці не хочуць. Гэта выклікае пытанні», — лічыць Пуцін. Варта адзначыць, што Зяленскі і не прапаноўваў выключаць ЗША з працэсаў.
Пуцін успомніў, як Трамп адчытаў Зяленскага з нагоды дрэс-кода.
«Даваць «Рэмба: Першая кроў» можа быць дарэчы, але не ўсюды. Гэта па-першае. Што датычыцца манер, у цэлым хачу падзякаваць Дональду за гэтую працу. Яна, безумоўна, з’яўляецца карыснай, але яшчэ ёсць над чым працаваць, трэба працягваць», — сказаў Пуцін.
Пуцін таксама расказаў, як адзін з расійскіх бізнесменаў ездзіў у Кіеў на перамовы тры тыдні таму. Паводле яго слоў, бізнесмен патэлефанаваў яму і расказаў пра запрашэнне ў Кіеў. Ён прапанаваў паехаць і перадаць Пуціну, пра што ішла гаворка.
«Ён паехаў у Кіеў і сустракаўся з гэтым спадаром, аўтарам гэтага ліста. У яго там у рэзідэнцыі, не на Валдаі. Вярнуўся. Я з ім сустрэўся. Акрамя ўсялякай шалупіны, самае галоўнае — спадар Зяленскі прасіў пра сустрэчу. Я кажу: я ніколі не адмаўляўся, але сустракацца, як у нас кажуць, з пустога ў парожняе пераліваць, я ведаю, я гэта праходзіў», — заявіў Пуцін, прывёўшы ў прыклад Мінскія пагадненні, якія, на яго думку, былі заключаныя, каб даць Украіне выйграць час.
Пуцін падкрэсліў, што не бачыць сэнсу ў сустрэчы.
«Я не бачу сэнсу сустракацца. Сэнс толькі для ўкраінскага боку — спыніць наступленне нашых узброеных сіл. Вось і ўсё. А нам патрэбныя дамоўленасці. Не на паўгода, не на тры месяцы, а на доўгатэрміновую гістарычную перспектыву. Няхай спецыялісты папрацуюць, выпрацуюць нейкія рашэнні. А пасля гэтага можна і сустракацца, прысутнічаць пры падпісанні нейкіх дакументаў або нават нешта падпісваць. Але спачатку трэба знайсці рашэнне», — сказаў Пуцін.
Пуцін заявіў, што ліст Зяленскага быў «з элементамі хамства». На яго думку, ліст стварае ўмовы, пры якіх правядзенне асабістых сустрэч немагчымае.
Пуцін завяршыў свой адказ зваротам да расійскіх вайскоўцаў і заклікам «Працуйце, браты».
