Ураджэнец Беларусі Раман Гофман сёння афіцыйна ўзначаліў «Масад» — Службу знешняй разведкі Ізраіля. На цырымоніі змены кіраўніцтва «Масада» прэм’ер-міністр Ізраіля Біньямін Нетаньяху згадаў Беларусь.
«Беларуская зямля дала Ізраілю цэлую плеяду лідараў», — адзначыў ён.
Нетаньяху нагадаў, што Гофман рэпатрыяваўся з бацькамі ў Ізраіль у 14 гадоў, і падкрэсліў, што ён самастойна праклаў свой шлях у гэтай краіне.
«Раман, ты пераадолеў усе перашкоды. Ты пераадолеў усе бар’еры на шляху да гэтай пасады. І цяпер ты афіцыйна прызначаешся 14-м дырэктарам ізраільскага Масада», — заявіў Нетаньяху.
Прэм’ер-міністр Ізраіля падкрэсліў, што «Масад» працягне змагацца з іранскім рэжымам, каб не дазволіць яму атрымаць ядзерную зброю і пагражаць існаванню Ізраіля.
Раман Гофман нарадзіўся ў Мазыры ў 1976 годзе. У 1990 годзе Гофман разам з бацькамі рэпатрыяваўся ў Ізраіль, дзе зрабіў вайсковую кар’еру. У кастрычніку 2023 года падчас нападу баевікоў ХАМАС на Ізраіль, яшчэ да абвяшчэння аб уварванні, разам са сваім кіроўцам накіраваўся ў бок Сдэрота, дзе разам з паліцэйскімі ўступіў у бой з тэрарыстамі. Быў паранены. Да прызначэння кіраўніком «Масада» займаў пасаду вайсковага сакратара Нетаньяху.
