Нафтаздабыўцы Персідскага заліва могуць вытрымаць 25 дзён перакрыцця Армузскага праліва. Такую ацэнку зрабіў інвестыцыйны банк JPMorgan Chase & Co, піша Bloomberg.
У ёй улічваюцца рэзервуарныя магутнасці сямі краін рэгіёна, уключаючы Іран. Яны складаюць 343 млн барэляў. Дадзеныя сховішчы могуць быць запоўненыя за 22 дні. У заліве таксама знаходзяцца яшчэ 60 пустых танкераў агульнай ёмістасцю 50 млн барэляў. У выніку здабываная нафта можа назапашвацца ў сховішчах на працягу 25 дзён. Пасля гэтага тэрміну, калі Армузскі праліў не стане бяспечным для суднаходства, краіны павінны будуць скарачаць або спыняць здабычу нафты.
З сямі краін толькі Саудаўская Аравія і Аб’яднаныя Арабскія Эміраты маюць трубаправоды для абыходу Армузскага праліва і выхаду на альтэрнатыўныя маршруты. Іх магутнасць будзе абмежаваная для дасягнення агульнага экспарту ў 19 млн барэляў у дзень.
Трэба адзначыць, што Іран сёння атакаваў найбуйнейшы НПЗ Saudi Aramco у Рас-Танура. Праца завода была прыпыненая, хоць удар і не адбіўся на адгрузках нафты.
На фоне вайны каціроўкі ф’ючэрсаў на нафту выраслі. Кошт найбліжэйшага ф’ючэрса на нафту маркі Brent сёння двойчы дасягаў адзнакі ў 80 долараў за барэль.
