Віцебскі абласны суд прызнаў вінаватым у забойстве маці 38-гадовага жыхара Віцебшчыны. Ён асуджаны паводле ч. 2 арт. 154, п.п. 2, 6 ч. 2 арт. 139 Крымінальнага кодэкса (катаванне і забойства з асаблівай жорсткасцю). Яму прызначана пакаранне ў выглядзе пазбаўлення волі тэрмінам на 14 гадоў і 7 месяцаў з адбываннем у папраўчай калоніі ва ўмовах узмоцненага рэжыму. Прысуд пакуль не ўступіў у законную сілу. Ён можа быць абскарджаны і апратэставаны.
У пракуратуры распавялі пра абставіны справы. Паводле версіі абвінавачання, мужчына, які злоўжываў спіртным, на працягу паўгода сістэматычна збіваў сваю 74-гадовую маці.
«Падчас навагодніх святаў таксама ў стане алкагольнага ап’янення віцеблянін на працягу некалькіх дзён збіваў пенсіянерку. Ён нанёс ёй не менш за 110 удараў рукамі і нагамі па розных частках цела, у тым ліку ў жыццёва важныя органы.
У выніку атрыманага закрытага траўматызму грудной клеткі і развіцця сардэчна-лёгачнай недастатковасці смерць пацярпелай наступіла на месцы здарэння», — гаворыцца ў паведамленні.
Падчас суда мужчына віну не прызнаў. Ён прызнаўся ў нанясенні некалькіх удараў, адзначыўшы, што смерці маці не жадаў.
Суд таксама прымяніў да мужчыны прымусовыя меры бяспекі і лячэння ад хранічнага алкагалізму.
На карысць пацярпелага, другога сына забітай, з абвінавачанага ў якасці матэрыяльнай кампенсацыі маральнай шкоды спагнана 20 тысяч рублёў.