Міністэрства замежных спраў Малдовы папярэдзіла грамадзян краіны пра ўзмацненне праверак пры ўездзе на тэрыторыю Расіі і Беларусі. Паводле даных ведамства, апошнім часам малдоўскія ўлады фіксуюць рост колькасці выпадкаў, калі грамадзяне Малдовы падвяргаюцца працяглым праверкам і дадатковым мерам кантролю пры перасячэнні мяжы дзвюх краін.
Як паведамілі ў МЗС, найбольш часта з такімі працэдурамі сутыкаюцца мужчыны ва ўзросце ад 18 да 60 гадоў, уладальнікі нядаўна выдадзеных пашпартоў, людзі, якія раней наведвалі Украіну, тыя, хто падарожнічае ў адзіночку, а таксама асобы, якія маюць расійскае грамадзянства.
Паводле інфармацыі міністэрства, праверкі могуць працягвацца ад трох да дванаццаці гадзін. У гэты перыяд у падарожнікаў могуць часова забіраць дакументы, патрабаваць падпісаць згоду на апрацоўку персанальных даных і даць доступ да мабільных тэлефонаў, камп’ютараў і іншых электронных прылад. Ведамства таксама паведамляе пра выпадкі капіравання даных з прылад, фатаграфавання, зняцця адбіткаў пальцаў і прапановы прайсці праверку на паліграфе.
Акрамя таго, паводле даных МЗС, супрацоўнікі кампетэнтных органаў задаюць пытанні пра прафесійную дзейнасць, членаў сям’і, месца жыхарства, паездкі ў іншыя краіны, уключаючы Украіну, а таксама пра стаўленне да расійска-ўкраінскай вайны і іншых палітычных пытанняў.
У міністэрстве папярэдзілі, што адмова выконваць патрабаванні ўладаў можа прывесці да адмовы ва ўездзе ў Расію або прымянення іншых адміністрацыйных мер, прадугледжаных мясцовым заканадаўствам. Таксама магчымыя значныя затрымкі, з-за якіх падарожнікі могуць прапусціць авіярэйсы або іншыя транспартныя перасадкі, не атрымаўшы пацвярджальных дакументаў.
Асобна ў МЗС заявілі, што атрымалі інфармацыю пра выпадкі, калі асоб, якія знаходзіліся пад адміністрацыйным арыштам, схілялі да падпісання кантрактаў на службу ва ўзброеных сілах Расійскай Федэрацыі.
У сувязі з гэтым міністэрства рэкамендуе грамадзянам Малдовы старанна ацэньваць неабходнасць паездак у Расію, загадзя азнаёміцца з ўмовамі ўезду і знаходжання, а пры ўзнікненні праблем неадкладна звяртацца ў дыпламатычныя прадстаўніцтвы або консульскія ўстановы Малдовы.
