Аляксандр Лукашэнка сёння прызначыў трох паслоў.
Як паведамілі ў яго прэс-службе, начальнік галоўнага ўпраўлення Еўропы МЗС Ігар Фісенка стаў паслом Беларусі ў Славакіі. Нагадаем, у мінулым годзе Славакія пасля прыходу да ўлады ўрада Роберта Фіца вярнула ў Мінск пасла. Ім стаў Ёзэф Мігаш, які раней ужо прадстаўляў інтарэсы сваёй краіны ў Мінску.
Намеснік начальніка ўпраўлення – начальнік упраўлення Афрыкі і Блізкага Усходу галоўнага ўпраўлення Азіі і Афрыкі МЗС Юрый Нікалайчык прызначаны паслом у Зімбабвэ. Да гэтага паслом у Зімбабвэ быў былы намеснік старшыні КДК, кіраўнік дэпартамента фінансавых расследаванняў Ігар Маршалаў.
Пасол Беларусі ў Кеніі Дзмітрый Красоўскі атрымаў дадатковую нагрузку. Па сумяшчальніцтве ён будзе прадстаўляць інтарэсы дзяржавы ў Танзаніі.
Настаўляючы новага пасла ў Зімбабвэ, Аляксандр Лукашэнка назваў краіну варотамі ў Афрыку.
“Зімбабвэ – гэта не геаграфічна, а філасофскі ўваход, вароты ў Афрыку”, – растлумачыў ён.
Лукашэнка нагадаў, што беларускі бок дапамагаў зімбабвійцам атрымаць неабходны ўраджай збожжавых.
“Яны забяспечылі сябе прадуктамі харчавання. Патроху ў ахове здароўя, адукацыі, па іншых напрамках рухаемся. Яны закупляюць нашу тэхніку, мы навучаем гэтых хлопцаў, вучым, як на ёй працаваць, перадаём тэхналогіі. І яны гэта расказваюць па ўсёй Афрыцы”, – сказаў ён.
Лукашэнка падкрэсліў, што прэзідэнт Зімбабвэ Эмерсан Мнангагва карыстаецца аўтарытэтам у Афрыцы і з’яўляецца “найлепшым прапагандыстам і агітатарам Беларусі”.
“Яго чуюць, слухаюць усе прэзідэнты, і ён кажа наўпрост: беларусы нас выратавалі, яны забяспечылі нашу харчовую бяспеку”, – сказаў ён.
Гаворачы пра Славакію, Лукашэнка адзначыў, што гэта дружалюбная краіна, якая мае сваё слова.
