Галоўнакамандуючы УСУ Аляксандр Сырскі заявіў, што ў яго няма канфлікту з былым міністрам абароны Украіны Міхаілам Фёдаравым. Пра гэта ён напісаў у сваёй калонцы на сайце Militarnyi.
«Для мяне стала нечаканасцю даведацца, што ў нас са спадаром міністрам быў канфлікт. Я ўспрымаў нашы адносіны як працоўныя: са складанымі пытаннямі, з рознымі пазіцыямі. Так і павінна быць паміж двума інстытутамі падчас вялікай вайны. Калі я кагосьці чымсьці пакрыўдзіў: Міхаіл Альбертавіч, прабачце. Бываю жорсткім», — напісаў Сырскі.
На думку Сырскага, звядзенне вайны да супрацьстаяння дзвюх асоб — «найбольшая паслуга, якую мы можам зрабіць ворагу».
Сырскі растлумачыў розніцу ў працы Мінабароны і арміі: Мінабароны адказвае за забеспячэнне войскаў, закупкі і грамадзянскі кантроль над УСУ, а галоўнакамандуючы УСУ нясе адказнасць за стратэгію вайны, планаванне аперацый і сітуацыю на фронце.
Сырскі адказаў на абвінавачанні ў адсутнасці ў яго стратэгіі. Ён падкрэсліў, што яе нельга прадстаўляць публічна.
«Калі мне ставяць у віну “адсутнасць стратэгіі”, нагадаю адну простую рэч: стратэгія вайны — гэта не публічны дакумент і не допіс у сацыяльных сетках. …Той, хто патрабуе ад Галоўнакамандуючага “прадставіць стратэгію” публічна, патрабуе прадставіць яе ворагу», — адзначыў Сырскі.
Галоўнакамандуючы УСУ таксама адхіляе абвінавачанні ў нібыта нежаданні выкарыстоўваць беспілотнікі. Сырскі нагадаў, што менавіта ён стварыў Сілы беспілотных сістэм як асобны род войскаў, але звярнуў увагу, што беспілотнікі — гэта не ўсё, што патрэбна арміі.
«Сёння дроны наносяць значную долю паражэнняў. Гэта факт. Але каб падрыхтаваць поле бою для эфектыўнай працы дронаў, патрэбныя артылерыя, мінамёты, інжынерныя сродкі, СПА, радыёэлектронная барацьба і яшчэ дзясяткі відаў узбраення. Генеральны штаб прадстаўляе міністэрству поўны пералік таго, што неабходна для вайны. Закупляць трэба ўсё, а не толькі тое, што цяпер у трэндзе», — лічыць Сырскі.
Сырскі таксама не згодны з меркаваннем, што ён прасоўвае толькі лаяльных да сябе людзей. Паводле яго слоў, адзіны крытэрый прасоўвання — вынік.
Ён таксама пракаментаваў рэформу мабілізацыі і заявіў, што гэта праца Мінабароны.
Сырскі раскрытыкаваў Фёдарава за перанакіраванне часткі сродкаў, прызначаных для заробкаў вайскоўцам, на закупку дронаў.
Напрыканцы Сырскі заявіў, што ваюе з Расіяй, а не з Мінабароны.
«Я не ваюю з міністэрствам. Я ваюю з Расіяй. Генеральны штаб ніколі не супрацьдзейнічаў міністэрству: мы супрацоўнічалі і будзем супрацоўнічаць з любым міністрам, якога прызначыць дзяржава. Бо ў арміі не выбіраюць, з кім служыць. У арміі выконваюць загады і робяць сваю працу. Але робяць яе якасна.
Мая праца — вайна. Стратэгія, фронт, людзі. Гэтым я займаюся і буду займацца далей. Пажадана без інтэрв’ю і калонак», — напісаў Сырскі.
Нагадаем, Міхаіл Фёдараў заявіў пра свой сыход з пасады міністра абароны 15 ліпеня. Пасля гэтага з’явіліся каментары пра рознагалоссі паміж Фёдаравым і Сырскім. Ва Украіне прайшлі акцыі пратэсту супраць адстаўкі Фёдарава.
