Літоўская паліцыя выявіла больш за дзясятак груп кантрабандыстаў цыгарэт з Беларусі. Частка з іх ужо ліквідаваная. Пра гэта ў эфіры LRT расказаў генеральны камісар паліцыі Літвы Арунас Паўлаўскас.
«Я не хацеў бы называць лічбу (груповак, што засталіся, — заўв. Reform.news), бо расследаванне працягваецца, але праца завершана не з усімі з іх. Думаю, у бліжэйшыя месяц-два ў нас будуць новыя вынікі», — сказаў ён.
Паводле слоў Паўлаўскаса, расследаванне працягваецца. Чакаюцца новыя затрыманні.
У маі літоўская паліцыя правяла буйную аперацыю, у выніку якой былі затрыманыя 27 чалавек, датычных да дзвюх груповак кантрабандыстаў. Сярод затрыманых былі 13 супрацоўнікаў паліцыі і памежнай службы, а таксама адзін грамадзянскі чыноўнік.
Усяго з канца мінулага года пасля стварэння спецыяльнай следчай групы былі затрыманыя 75 чалавек, датычных да кантрабанды. 28 з іх знаходзяцца пад вартай.
