Кіраўніца Аб’яднанага пераходнага кабінета Святлана Ціханоўская, яе намеснік Павел Латушка і спікер Каардынацыйнага савета Арцём Брухан сустрэліся са спікеркай Сената Польшчы Малгажатай Кідавай-Блоньскай, паведамляе Офіс Ціханоўскай.
Ціханоўская падзякавала Польшчы за прыём вызваленых палітвязняў. Бакі абмеркавалі пытанні легалізацыі беларусаў, у тым ліку вызваленых палітвязняў.
Таксама абмяркоўвалася супрацоўніцтва паміж дэмакратычнымі сіламі і Сенатам Польшчы, у тым ліку магчымасць падпісання мемарандума аб супрацоўніцтве, праца парламенцкай групы «За дэмакратычную Беларусь» у польскім Сейме і Сенаце, правядзенне вялікай канферэнцыі па Беларусі ў польскім парламенце.
Прадстаўнікі беларускай дэлегацыі расказалі пра прыярытэты дэмакратычных сіл на 2026 год і пра падрыхтоўку да выбараў у Каардынацыйны савет. Абмяркоўваўся магчымы ўдзел назіральнікаў ад польскага парламента.
Кідава-Блоньская выказала падтрымку дэмакратычным сілам Беларусі і падкрэсліла, што Варшава працягне аказваць дапамогу беларусам у Польшчы і працягне дамагацца вызвалення ўсіх палітвязняў, у тым ліку Анджэя Пачобута.
«У Польшчы беларускае пытанне аб’ядноўвае ўсе сілы і палітычныя партыі, і тут, у польскім парламенце, існуе кансэнсус па Беларусі. Я рада, што ў нас ёсць такія саюзнікі і агульнае разуменне — што толькі свабодная і незалежная Беларусь будзе надзейным суседам і партнёрам для Польшчы і ўсяго Еўрапейскага саюза. Так мы змагаемся за вызваленне людзей, але наша мэта — незваротныя дэмакратычныя змены ў нашай краіне», — заявіла Ціханоўская.
