Авіяцыйныя ўлады Латвіі вырашылі на месяц падоўжыць абмежаванні на вячэрнія і начныя палёты ў прыгранічнай паветранай прасторы, піша ТАСС. Забарана распаўсюджваецца на ўсе тыпы паветраных суднаў і дзейнічае ўздоўж межаў з Расіяй і Беларуссю.
Як паведамілі ў дыспетчарскай службе раёна палётнай інфармацыі «Рыга», новыя абмежаванні ўведзеныя адразу да 18 лютага. Яны прымяняюцца штодня з 17:00 да 05:00 па сусветным часе (з 20:00 да 08:00 па Мінску). Гаворка ідзе пра палёты на вышынях да шасці кіламетраў.
Падобныя меры былі ўпершыню ўведзеныя ў верасні 2025 года і з таго часу падаўжаліся на кароткія тэрміны, як правіла — штотыдзень. Цяпер тэрмін дзеяння абмежаванняў павялічаны да месяца.
У дыспетчарскай службе ўдакладнілі, што аналагічныя абмежаванні распаўсюджваюцца таксама на палёты ўздоўж межаў з Эстоніяй і Літвой. Інфармацыя аб абмежаваннях даведзена да ўсіх карыстальнікаў паветранай прасторы Латвіі.
Выключэнні з забароны магчымыя толькі для рэйсаў, якія атрымалі дазвол ваеннага ведамства.
