Сям’я Кастра спрабавала ўсталяваць прамы кантакт з прэзідэнтам ЗША Дональдам Трампам у абыход дзяржсакратара Марка Рубіа. Пра гэта піша The Wall Street Journal са спасылкай на амерыканскіх чыноўнікаў.
Паводле інфармацыі выдання, унук Рауля Кастра звярнуўся да 37-гадовага кубінскага прадпрымальніка Раберта Карласа Чаміса Гансалеса, які займаецца пракатам аўтамабіляў і турызмам. Яму было перададзена пісьмо, аформленае па ўзоры дыпламатычнай ноты. У ім прапаноўвалі эканамічныя і інвестыцыйныя пагадненні, а таксама змякчэнне санкцый. Аднак Гансалеса не пусцілі ў ЗША. Яго адправілі з Маямі назад у Гавану, пры гэтым амерыканскі чыноўнік забраў у кур’ера пісьмо. Ці атрымалі яго ў Белым доме, невядома.
Выданне адзначае, што Трамп можа быць схільны да заключэння пагаднення з Кубай, якое пакіне пры ўладзе большую частку сённяшніх лідараў, як гэта адбылося з Венесуэлай. Аднак падобная здзелка будзе непрымальнай для часткі амерыканцаў кубінскага паходжання, уключаючы кангрэсменаў і чыноўнікаў, якія нацэлены на змену палітычнага ладу на востраве, кантраляваным камуністамі.
