Кіраўніца Аб’яднанага пераходнага кабінета Святлана Ціханоўская правяла сустрэчу з міністрам замежных спраў Эстоніі Маргусам Цахкнам. Перамовы адбыліся 15 студзеня ў Вільні.
Палітык падзякавала міністру за падтрымку рэпрэсаваных, Міжнароднага гуманітарнага фонду і Місіі дэмакратычнай Беларусі ў Таліне. Бакі абмеркавалі сітуацыю з бяспекай у рэгіёне, падзеі ў Іране і Венесуэле, працэс і далейшыя крокі па вызваленні палітвязняў, адносіны з ЗША, сумесныя ініцыятывы ў міжнародных арганізацыях, а таксама санкцыйную палітыку Еўрапейскага саюза.
Ціханоўская падкрэсліла, што міжнародны ціск на беларускія ўлады, на яе думку, павінен захоўвацца да спынення рэпрэсій і пачатку сістэмных зменаў у краіне. Яна таксама прадставіла прыярытэты дэмакратычных сіл Беларусі на 2026 год.
Падчас сустрэчы абмяркоўвалася дзейнасць Місіі дэмакратычных сіл Беларусі ў Таліне, магчымасць пашырэння яе працы на суседнія краіны, супрацоўніцтва з Паўночнымі краінамі і фарматам Паўночна-Балтыйскай васьмёркі, а таксама ўдзел вызваленых палітвязняў у міжнародных канферэнцыях. Акрамя таго, бакі закранулі пытанне прызнання беларускага нацыянальнага пашпарта.
Кіраўнік МЗС Эстоніі пацвердзіў гатоўнасць Таліна працягваць падтрымку беларускіх дэмакратычных сіл як на нацыянальным узроўні, так і ў межах Еўрасаюза. Ён таксама адзначыў, што Эстонія, абраная ў Савет ААН па правах чалавека, мае намер актыўна падымаць беларускую тэматыку на гэтай пляцоўцы.
«Я ўдзячная міністру Цахкну і ўсёй камандзе Міністэрства замежных спраў Эстоніі за паслядоўную падтрымку беларусаў і Беларусі. Беларусы ў Эстоніі адчуваюць сябе ў бяспецы, і мы сістэмна вырашаем пытанні дыяспары. Эстонцы выдатна разумеюць нашу барацьбу за свабоду і незалежнасць, бо самі прайшлі гэты шлях. Асабліва ўдзячная за падтрымку нашай місіі ў Таліне і спадзяюся, што ў гэтым годзе нам удасца рэалізаваць шэраг новых ініцыятыў», — заявіла Ціханоўская па выніках сустрэчы.
