Былога байца палка Каліноўскага Васіля Грэчыху перавялі ў калонію №2 у Бабруйску, паведамляе праваабарончы цэнтр «Вясна».
Грэчыху прысудзілі да пяці гадоў пазбаўлення волі. Яго абвінавацілі ў «удзеле ва ўзброеным канфлікце без упаўнаважання дзяржавы сваёй грамадзянскай прыналежнасці ў складзе названай злачыннай арганізацыі».
Пра затрыманне Васіля Грэчыхі стала вядома ў траўні з сюжэту, паказанага па беларускім тэлебачанні. У сюжэце яго са сцяжкай на руках і пакетам на галаве вядуць па балоце трое ўзброеных людзей у камуфляжы. Дзе адбылося затрыманне — невядома. На машыне Грэчыху прывозяць да вайсковага верталёта і перадаюць супрацоўнікам КДБ. Падчас пералёту Грэчыха ляжыць на падлозе, супрацоўнік КДБ прыціскае яго нагой да падлогі. На выхадзе з верталёта яго сустракае Канстанцін Бычак, начальнік Следчага ўпраўлення КДБ.
Да Палка Каліноўскага Грэчыха далучыўся ў траўні 2022 года, аднак неўзабаве пакінуў падраздзяленне.
