У Літве будуць судзіць шасцярых замежнікаў за спробу падпалу абсталявання, прызначанага для Узброеных сіл Украіны. Сярод абвінавачаных — грамадзяне Беларусі, Расіі, Іспаніі, Калумбіі і Кубы. Ім прад’яўлены абвінавачанні ва ўдзеле ў дзейнасці арганізаванай тэрарыстычнай групы, фінансаванні тэрарыстычнай дзейнасці і няўдалых спробах здзяйснення тэрарыстычнага акту. Крымінальная справа перададзеная на разгляд у Шаўляйскі абласны суд.
Як паведамілі ў Генпракуратуры Літвы, абвінавачаныя спрабавалі здзейсніць падпал на тэрыторыі кампаніі TVC Solutions у Шаўляі ў верасні 2024 года. Іх мэтай былі мабільныя станцыі аналізу радыёчастотнага спектру, прызначаныя для Узброеных сіл Украіны, коштам каля 1,5 млн еўра. Усяго ж на пляцоўцы знаходзілася прадукцыі на 4 млн еўра.
Паводле версіі абвінавачвання, спачатку спробу падпалу 17 верасня здзейснілі двое грамадзян Іспаніі, адзін з якіх таксама мае грамадзянства Калумбіі. Яны прынеслі на месца сродкі для падпалу, аднак выканаць задуму ім перашкодзілі выпадковыя мінакі, якія спалохалі зламыснікаў. Абвінавачаныя пакінулі месца здарэння і накіраваліся ў Рыгу. Пазней у той жа дзень яны былі затрыманыя ў Латвіі спецслужбамі.
Другая спроба была здзейснена 22 верасня. На гэты раз выканаўцамі былі грамадзяне Расіі і Беларусі, якія прыбылі ў Шаўляй з Іспаніі. Яны здзейснілі падпал і, будучы ўпэўненымі ў поспеху, пакінулі месца здарэння. Аднак у выніку мэта не была дасягнута, бо выкарыстаныя для падпалу сродкі не змаглі падпаліць прадукцыю на тэрыторыі прадпрыемства.
На наступны дзень да TVC Solutions прыехала грамадзянка Кубы, якая павінна была зафіксаваць наступствы падпалу. Выканаўшы заданне, яна збіралася выехаць з Літвы, але была затрыманая.
У ходзе расследавання таксама быў устаноўлены грамадзянін Калумбіі, які пражывае ў Іспаніі, роля якога заключалася ў фінансаванні групы і пасярэдніцтве. Ён быў затрыманы ў Іспаніі і ў маі мінулага года выдадзены Літве.
Цяпер усе абвінавачаныя знаходзяцца пад арыштам у Літве.
Працягваецца следства ў дачыненні яшчэ да чатырох падазраваных. Адзін з іх затрыманы ў Калумбіі. Ідзе працэс яго экстрадыцыі. Пракуратура апублікавала фатаграфіі яшчэ трох падазраваных.
Аб’яднаная следчая група, створаная для расследавання падпалаў у Літве, Румыніі, Польшчы і Чэхіі, прыйшла да высновы, што ўсе спробы каардынаваліся грамадзянамі Кубы і Калумбіі, якія пражываюць у Расіі і звязаныя з Галоўным разведвальным упраўленнем РФ.
«Даныя дасудовага расследавання, праведзенага ў Літве, дазваляюць з дастатковай ступенню верагоднасці меркаваць, што спробы сабатажу ў Шаўляі былі здзейсненыя па ўказанні і ў інтарэсах ГРУ РФ.
Сабраныя ў ходзе дасудовага расследавання даныя таксама ўказваюць на тое, што ў вышэйзгаданую арганізаваную тэрарыстычную групу могуць уваходзіць і іншыя асобы, не звязаныя са спробамі здзяйснення злачынстваў у Шаўляі і якія здзейснілі аналагічныя дзеянні ў Чэхіі, Румыніі і Польшчы», — заявілі ў пракуратуры.
