Еўразійскі банк развіцця чакае, што ў 2026 годзе інфляцыя ў Беларусі захаваецца на цяперашнім узроўні. На мінулым тыдні Белстат паведаміў, што ў 2025 годзе гадавая інфляцыя склала 6,8%.
«Харчовая інфляцыя запаволілася да 9% г/г пасля 9,9% г/г месяцам раней. Гэта было абумоўлена істотным зніжэннем тэмпаў росту цэн на сезонную гародніну і садавіну — да 1,3% г/г з 12,7% г/г у лістападзе. Цэны на нехарчовыя тавары выраслі на 3% г/г (пасля 2,8% г/г у лістападзе). Інфляцыя ў сектары паслуг паскорылася да 8% г/г з 7,7% г/г месяцам раней. Базавая інфляцыя павысілася да 7,3% г/г пасля 7% г/г у лістападзе, перапыніўшы зніжэнне, якое працягвалася чатыры месяцы запар», — гаворыцца ў штотыднёвым аглядзе эканомік краін – удзельніц ЕАБР.
Аналітыкі банка лічаць, што ў 2026 годзе інфляцыя ў Беларусі будзе захоўвацца на ўзроўні, блізкім да мэтавага.
«На фоне высокай спажывецкай актыўнасці і павышэння стаўкі ПДВ у Расіі чакаем захавання інфляцыі ў 2026 годзе паблізу абноўленага мэтавага арыенціра на ўзроўні 7%», — заключылі ў ЕАБР.
Нагадаем, мэтавы паказчык па інфляцыі, устаноўлены для ўрада і Нацбанка, у гэтым годзе складае не больш за 7%.
