Цэнтральнае камандаванне ЗША, якое адказвае за аперацыі на Блізкім Усходзе, прызнала страту трох знішчальнікаў F-15E Strike Eagle у небе над Кувейтам.
У афіцыйным паведамленні камандавання гаворыцца, што самалёты выконвалі задачы ў межах аперацыі «Эпічная ярасць». Яны былі збітыя над Кувейтам у выніку “дружалюбнага агню”.
“Падчас актыўных баявых дзеянняў, якія ўключалі атакі іранскай авіяцыі, балістычных ракет і беспілотнікаў, знішчальнікі ВПС ЗША былі па памылцы збітыя кувейцкай сістэмай СПА”, – гаворыцца ў паведамленні.
Усе шэсць амерыканскіх лётчыкаў, якія складалі экіпажы знішчальнікаў, паспяхова катапультаваліся, былі эвакуяваныя і знаходзяцца ў стабільным стане.
“Кувейт прызнаў гэты інцыдэнт, і мы ўдзячныя за намаганні кувейцкіх сіл абароны і іх падтрымку ў гэтай аперацыі, што працягваецца. Прычына інцыдэнту расследуецца. Дадатковая інфармацыя будзе апублікаваная па меры паступлення”, – гаворыцца ў паведамленні.
Відэа з падаючым ваенным самалётам у небе Кувейта з’явіліся сёння раніцай у сацыяльных сетках. Пазней Міністэрства абароны Кувейта паведаміла, што некалькі амерыканскіх самалётаў пацярпелі крушэнне. Іранскія СМІ спрабавалі выставіць падзенне самалётаў як вынік дзеянняў іранскіх сіл.
