Святлана Ціханоўская сёння бярэ ўдзел у форуме GLOBSEC, які праходзіць у Празе. Гэта адна з ключавых пляцовак у сферы бяспекі.
Яна выступіла на панэлі “Абарона абаронцаў дэмакратыі на перадавой”, прысвечанай транснацыянальным рэпрэсіям і абароне актывістаў, журналістаў і дыяспары.
Паводле яе слоў, праблема транснацыянальных рэпрэсій расце. Яна не абмяжоўваецца адной краінай. Гэта ўяўляе новы выклік для міжнароднай бяспекі.
“Дыктатуры развіваюцца, і яны вучацца адна ў адной. Яны абменьваюцца тэхналогіямі, метадамі, інструментамі сачэння і тактыкай запалохвання. Яны супрацоўнічаюць на сусветным узроўні супраць дэмакратый”, – сказала яна.
Ціханоўская падкрэсліла, што нават у эміграцыі беларусы застаюцца пад ціскам. Яна адзначыла, што нават пры наяўнасці міжнароднай абароны і статусу ўцекача людзі не знаходзяцца ў бяспецы.
“Рэжым можа пагражаць вашай сям’і. Ануляваць ваш пашпарт. Сачыць за вамі. Узламаць ваш тэлефон. Завесці крымінальныя справы. Выкарыстоўваць Інтэрпол супраць вас. Распаўсюджваць прапаганду пра вас. І нават фізічна атакаваць вас за мяжой”, – сказала яна.
“Па-першае, дэмакратычныя краіны павінны прызнаць транснацыянальны пераслед сур’ёзнай пагрозай бяспецы.
Па-другое, нам патрэбная лепшая абарона для журналістаў, актывістаў, палітычных уцекачоў і супольнасцяў дыяспары.
Па-трэцяе, нам патрэбная больш хуткая легалізацыя і афармленне дакументаў для людзей, якія ўцякаюць ад аўтарытарных рэжымаў.
Па-чацвёртае, павінны быць наступствы для вінаватых: санкцыі, крымінальныя расследаванні, забарона на выдачу віз, падсправаздачнасць.
Па-пятае, мы павінны пазбавіць дыктатуру доступу да міжнародных механізмаў, такіх як Інтэрпол.
І, нарэшце, дэмакратыі павінны супрацоўнічаць больш цесна, таму што дыктатуры ўжо робяць гэта”, – заключыла яна.
