Святлана Ціханоўская павіншавала беларусаў з Раством. Яна пажадала светлага і спакойнага свята.
«Дарагія. Віншую Вас з Божым Нараджэннем. Гэтае свята заўсёды вяртае нас да простых рэчаў, да сямейных гутарак, да спакойнага вечара, да пачуцця, што побач ёсць людзі, якім мы не абыякавыя. У такія дні асабліва адчуваеш, як важна мець месца, дзе цябе чакаюць.
Я хачу пажадаць вам сапраўднай цішыні. Той, якая дапамагае сабрацца з думкамі пасля насычанага года, пажадаць шчырых сустрэчаў з дарагімі і блізкімі, якія саграваюць сэрцы мацней за любыя словы.
І каб у гэтыя святочныя калядныя дні кожны адчуў сябе хоць крышачку дома. Нават калі дом цяпер у іншай краіне, а родныя па розныя бакі мяжы. Беражыце сябе і сваіх блізкіх, светлых і спакойных святаў», — сказала яна.
