Валерый Цапкала заявіў, што сустрэўся ў Белым доме з намеснікам саветніка прэзідэнта ЗША па нацыянальнай бяспецы і саветнікам віцэ-прэзідэнта ЗША па нацыянальнай бяспецы Эндру Бэйкерам.
“У прыватнасці, абмеркавалі пытанні рэгіянальнай бяспекі і ўдзел Беларусі ў вайне Расіі супраць Украіны. Было прапанавана, каб пры падрыхтоўцы будучай мірнай дамовы па Украіне Беларусь была ўключана ў яе як дзяржава, якая прыняла ўдзел у вайне, прадаставіўшы для ваеннай кампаніі Расіі сваю тэрыторыю і інфраструктуру”, — напісаў палітык у сваім ТГ-канале.
Акрамя таго, паводле яго слоў, абмяркоўваўся ўплыў штучнага інтэлекту на міжнародную бяспеку, у прыватнасці “ініцыятыва прыцягнення Нобелеўскіх лаўрэатаў да падрыхтоўкі стратэгічнага даклада аб магчымасцях і рызыках ШІ для сусветнай палітыкі, эканомікі і бяспекі”. Яшчэ адной тэмай сталі “інавацыйныя мадэлі пасляваеннага і пасляканфліктнага аднаўлення эканомік”. Гаворка ішла пра краіны Блізкага Усходу, Венесуэлу і Кубу.
“Тэхналагічныя экасістэмы могуць стаць інструментам хуткага эканамічнага перазапуску і ўстойлівага развіцця.
Асобна прадставілі ініцыятыву Computer Class for Every School in Africa, накіраваную на пераадоленне глабальнай лічбавай няроўнасці і стварэнне камп’ютарных класаў для школ па ўсім афрыканскім кантыненце на базе выкарыстаных камп’ютараў з карпаратыўнага сектара.
Мы дамовіліся працягнуць узаемадзеянне па пытаннях бяспекі, тэхналогій і развіцця як элементаў адзінай стратэгічнай павесткі”, — заключыў Цапкала.
