Беларускі расследавальніцкі цэнтр пры падтрымцы “Рабочага Руху” і “Кіберпартызан” высветліў, хто стаіць за новым спецыяльным экспарцёрам ЗАТ «ГрандСпецТрэйдынг».
У сакавіку гэтага года ўказам Лукашэнкі кампанія была ўключана ў пералік спецэкспарцёраў, гэта значыць атрымала права гандляваць прадукцыяй ваеннага прызначэння. Яна стала чацвёртым спецэкспарцёрам. Тры іншыя кампаніі з такім статусам — «Белзнешпрамсэрвіс», «Белспецзнештэхніка» і «БЕЛТЭХЭКСПАРТ» — працуюць яшчэ з мінулага стагоддзя.
Расследавальнікам удалося атрымаць інфармацыю пра дырэктара «ГрандСпецТрэйдынга». З сакавіка яго ўзначальвае Яўген Галоўчыц. За яго плячыма служба ў сістэме МУС, дзяржсакратарыяце Савета бяспекі, Аператыўна-аналітычным цэнтры. Апошнім часам ён працаваў намеснікам начальніка Інстытута павышэння кваліфікацыі і перападрыхтоўкі Следчага камітэта. У яго, паводле даных расследавальнікаў, таксама быў пашпарт прыкрыцця на імя Яўгена Малахоўскага.
У працэс рэгістрацыі «ГрандСпецТрэйдынга» быў уцягнуты супрацоўнік адной з арганізацый Кіраўніцтва справамі прэзідэнта — Аляксандр Юрачкін. Расследавальнікі лічаць яго звязаным з Віктарам Шэйманам. Юрачкін працаваў у сістэме кіравання, калі ёю кіраваў Шэйман.
За некалькі месяцаў да сыходу Шэймана з дзяржаўнай службы Юрачкін пачаў па сумяшчальніцтве працаваць у ЗАТ «Вектар Капітал Груп». Гэтая кампанія лічыцца ценявой бізнес-імперыяй Шэймана.
Журналіст БРЦ пад выглядам патэнцыйнага кліента «ГрандСпецТрэйдынга» некалькі разоў тэлефанаваў Аляксандру Юрачкіну. Падчас адной з размоў той назваў імя Уладзіміра Скулаўца, параіўшы звяртацца да яго наконт супрацоўніцтва з новым спецэкспарцёрам.
Паводле даных «Кіберпартызан», Уладзімір Скулавец служыў у Галоўным штабе УС Беларусі (цяпер — Генеральны штаб УС РБ) з 1996 па 2001 год. У «Кіберпартызан» няма дакладнай інфармацыі пра месца яго ваеннай службы ў 2001—2008 гадах, што ўскосна пацвярджае сакрэтны характар спецпадраздзялення, якім, паводле даных журналістаў, кіраваў Скулавец. Раней журналісты называлі Скулаўца «самай даверанай асобай Шэймана».
Цалкам расследаванне можна прачытаць на сайце БРЦ.
