У краінах Блізкага Усходу знаходзяцца больш за 3 тысячы беларускіх турыстаў, якія набылі пуцёўкі праз турагенцтвы. Пра гэта ў эфіры «Першага нацыянальнага» расказаў Кірыл Машарскі, дырэктар Нацыянальнага агенцтва па турызме.
У ААЭ знаходзіцца больш за 2,5 тысячы турыстаў, у Амане — 319, у Катары — каля 200 чалавек.
Паводле слоў Машарскага, пасля закрыцця паветранай прасторы Агенцтва ўстанавіла сувязь з усімі беларускімі дыппрадстаўніцтвамі ў рэгіёне.
«У дыпламатычных прадстаўніцтвах была аператыўна арганізавана работа, гарачая лінія, паступаюць званкі нашых грамадзян. Ніякай панікі зусім няма, проста мы інфармуем нашых грамадзян і рэкамендуем ім знаходзіцца ў сродках размяшчэння, пазбягаць знаходжання ва ўрадавых кварталах альбо ў месцах, дзе ёсць ваенныя аб’екты, знаходзіцца ў сродках размяшчэння і спакойна весці сваю жыццядзейнасць у чаканні вырашэння дадзенай сітуацыі», — расказаў Машарскі.
Часовы ўпаўнаважаны ў Катары сустрэўся са 186 турыстамі ў Досе, якія чакаюць вяртання ў Беларусь. Прапрацоўваецца пытанне эвакуацыі беларусаў з Эр-Рыяда ў Саудаўскай Аравіі.
«Нашы аператары і дыпламаты спрыяюць таму, каб падаўжэнне знаходжання нашых грамадзян у сродках размяшчэння пакуль ажыццяўлялася бязвыплатна. Для нас гэта прынцыповы момант — аказаць садзейнічанне нашым грамадзянам, то-бок мы знаходзімся на сувязі, таксама гарачая лінія адкрыта ў нашым Нацыянальным агенцтве, ёсць гарачая лінія і ў нашых дыпламатычных прадстаўніцтвах. Яны спрацавалі вельмі аператыўна і пастаянна знаходзяцца ў кантакце з нашымі грамадзянамі», — заявіў Машарскі.
Нагадаем, “Белавія” плануе чартарны рэйс у Доху 3 сакавіка. Рэйс Мінск – Дубай – Мінск быў у чарговы раз адменены.
