Былы палітвязень Павел Спірын пакінуў Беларусь і на дадзены момант знаходзіцца ў Літве. Відэа з былым палітвязнем апублікаваў кіраўнік ініцыятывы BELAID Андрэй Стрыжак.
“Блогер Павел Спірын у Літве! У бяспецы, на волі і ў добрым настроі”, – напісаў ён.
“Усім прывітанне, вось нарэшце я выехаў з Беларусі, цяпер знаходжуся ў Літве. Вялікі дзякуй усім за падтрымку, за тое, што ўсе гэтыя гады былі са мной і з іншымі людзьмі, якія не паспелі дарабіць тое, што мы павінны былі дарабіць у 2020 годзе. Але ўсё наперадзе”, – кажа Спірын на відэа.
Нагадаем, у лютым 2021 года Спірына прысудзілі да 4,5 года калоніі па артыкуле аб распальванні варожасці (ч. 1 арт. 130 КК). Справа датычылася двух відэа на YouTube-канале блогера: фільма «Грань» пра антынаркатычнае заканадаўства і «Жудасная таямніца генпракурора Беларусі: карт-бланш на садызм» пра падзеі 9 жніўня 2020 года. У 2024 годзе, за месяц да заканчэння тэрміну, яго зноў судзілі па артыкуле аб непадпарадкаванні адміністрацыі калоніі. У студзені стала вядома, што пасля больш як пяці гадоў у зняволенні Павел выйшаў на волю.
Відэа: Аляксандр Кабанаў