У Варшаве сёння прайшоў марш, прысвечаны Дню Волі. Шэсце з 330-метровым бела-чырвона-белым сцягам стартавала з плошчы Трох Крыжоў і ў суправаджэнні дудароў накіравалася на Замкавую плошчу, дзе быў запланаваны мітынг і арт-кірмаш.
У мерапрыемстве прынялі ўдзел кіраўніца ОПК Святлана Ціханоўская і яе намеснік Павел Латушка, а таксама польскія палітыкі і грамадскія дзеячы, у тым ліку Гжэгож Схетына — старшыня камітэта па замежных справах Сената Польшчы, былы міністр замежных спраў, а таксама дэпутат Сейма Аліцыя Лепкоўска і грамадска-палітычны дзеяч Адам Міхнік.
У канцы шэсця Святлана Ціханоўская звярнулася да прысутных:
«Мы выходзім, бо нельга не выходзіць. Нельга сядзець, маўчаць, проста перачакаць. Ніхто, акрамя нас саміх, беларусаў, свабоду за нас не заваюе. Мы выходзім сёння за нашых палітычных зняволеных… І мы будзем выходзіць, пакуль кожны і кожная не апынецца на волі. Мы выходзім, каб аднавіць справядлівасць. Каб спыніўся тэрор. Мы патрабуем поўнай палітычнай амністыі. Мы выходзім — у рэшце рэшт, проста каб убачыць адно аднаго. Пагаварыць. Натхніцца. І падзякаваць. І я веру, што ў нас усё атрымаецца. І разам мы ўсё пераадолеем! Жыве Беларусь!»
