Беларускія турысты падчас двухтыднёвага паходу ў гарах Алмацінскай вобласці Казахстана выявілі чалавечыя парэшткі на ледавіку Северцава. Ратавальнікі вылецелі ў раён для правядзення работ па іх спуску, піша Tengrinews.kz.
Пра інцыдэнт расказала у Facebook сяброўка беларусаў Анастасія Ахметава. Паводле яе слоў, гэта здарылася падчас спуску з маршруту 16 жніўня. Яны перадалі ў службу 109 каардынаты, фатаграфіі і відэа з месца. Аўтарка паста сцвярджае, што пра цела, якое знаходзілася на ледавіку, турысты ведалі са справаздач расійскіх турыстычных груп яшчэ з 2025 года і гэтым летам іншыя групы таксама праходзілі міма парэшткаў.
“Паколькі ўсе мы трошкі людзі, якія ходзяць у горы, і ў кожнага алмацінца ёсць свае знаёмыя супрацоўнікі НС – стала зразумела, што пакуль здымаць яго з ледавіка ніхто не збіраецца – каманды не было. Асабіста я лічу, што пакідаць там парэшткі не па-хрысціянску, не па-мусульманску і ўвогуле не па-чалавечы, гэта чыйсьці сын, чыйсьці бацька, чыйсьці брат і ўвогуле гэта не справа, каб у нашых гарах целы ляжалі – турысты натыкаюцца – за гэтае лета як мінімум дзве групы міма цела прайшлі.
У турыстычных справаздачах тур-групы з Расіі 25-га года пры падрыхтоўцы да маршруту беларускія турысты ўжо чыталі пра тое, што там чалавек, бачылі фота, яны былі ўпэўненыя, што цела з ледавіка ўжо прыбралі. Мае беларусы там жа непадалёк натыкнуліся на групу з 3-х піцерцаў, тыя сказалі, што ўзялі дакументы з заплечніка, каб перадаць у МНС – перадалі тыя ці не – невядома”, – напісала яна.
У дэпартаменце па НС Алматы журналістам паведамілі, што яны ў курсе сітуацыі і працуюць сумесна з дэпартаментам паліцыі.
“Мы адразу прынялі ў працу. У гэтым выпадку ратавальнікі працуюць калегіяльна, не адны прымаюць рашэнне. Таму што ёсць база зніклых без вестак, (прымаецца пад увагу), ці звярталіся сваякі, ці ёсць заява. Мы працуем сумесна з супрацоўнікамі паліцыі. Цяпер удакладняем алгарытм дзеянняў. Ратавальнікі заўсёды гатовыя”, — праінфармавалі ў прэс-службе ДНС.
Пазней ДНС паведаміў, што авіяборт «Казавіяспаса» МНС з ратавальнікамі Рэспубліканскага аператыўна-выратавальнага атрада «Барыс» і супрацоўнікамі Цэнтра медыцыны катастроф вылецеў да ледавіка Северцава.
Гісторыя атрымала працяг. У каментарыях да навіны, апублікаванай у Instagam Tengri Almaty жыхарка Казахстана Нэля Міхеева пазнала на фота заплечнік свайго бацькі, які знік у 2007 годзе.
“Гэта парэшткі майго бацькі. Ён знік у 2007 годзе. Дзякуй ратавальнікам і следчаму. Ужо ўсё пацвердзілася”, – напісала яна.
У сторыс яна расказала, што звязалася з супрацоўнікамі МНС, якія спусцілі цела і рэчы з гор, і са следчым. Апошні пазней ператэлефанаваў і паведаміў, што ў заплечніку знайшлі пасведчанне на імя яе бацькі.
