Прадстаўнікі беларускіх дэмсілаў па запрашэнні прэм’ер-міністра Іспаніі прынялі ўдзел у міжнароднай платформе Global Progressive Mobilization. Яна аб’ядноўвае палітычных лідараў, партыі, прафсаюзы, грамадскія арганізацыі для каардынацыі дзеянняў у сферы абароны дэмакратыі і сацыяльнай справядлівасці.
Беларусь прадстаўлялі дыпламатычны дарадца Ціханоўскай Дзяніс Кучынскі і кіраўніца місіі дэмсілаў у Мадрыдзе Таццяна Марыніч.
Як паведамілі ў Офісе Ціханоўскай, удзел беларускай дэлегацыі дазволіў узняць пытанне Беларусі ў парадку дня яшчэ адной міжнароднай платформы.
Для беларускіх дэмсілаў ён таксама стаў магчымасцю ўдзельнічаць у фарміраванні сучасных транснацыянальных механізмаў падтрымкі дэмакратыі.
Платформа таксама дае магчымасць пашырыць партнёрства ў Еўропе і за яе межамі. Адбыліся кантакты з прадстаўнікамі іспанскіх сацыялістаў (PSOE) і Партыі еўрапейскіх сацыялістаў (PES).
Паводле слоў Дзяніса Кучынскага, таксама ўдалося пашырыць кантакты з прадстаўнікамі краін Поўдня і Лацінскай Амерыкі.
«У межах канферэнцыі была магчымасць усталяваць кантакт з краінамі Поўдня і Лацінскай Амерыкі. Меў кароткую размову з прэзідэнтам Бразіліі Луісам Інасіу Лула да Сілва — адной з ключавых фігур G20 і лідарам краіны, якая адыгрывае значную ролю ў глабальнай палітыцы і міжнародных эканамічных адносінах», – адзначыў Кучынскі.
Удзел у форуме дазволіў умацаваць прысутнасць дэмакратычных сіл Беларусі ў міжнародных дэмакратычных сетках, пашырыць супрацоўніцтва з палітычнымі партыямі, няўрадавымі арганізацыямі і прафсаюзамі, прадставіць беларускі досвед як прыклад барацьбы за дэмакратыю і грамадзянскія правы, умацаваць пазіцыі Беларусі як часткі глабальнай кааліцыі дэмакратычных сіл.
